Prezantohet Operacioni “Forca e Ligjit” – Xhafaj: Luftë pa kompromis ndaj “të fortëve”. Të ndalojmë paratë e krimit në ekonomi

Ministri i Brendshëm, Fatmir Xhafaj ka prezantuar sot Operacioni “Forca e Ligjit” në një takim ku të pranishëm ishin edhe Ambasadorët Lu dhe Vlahutin.

Në fjalën e tij kreu i ministrisë së Brendshme pohoi se qeveria i ka shpallur luftë pa kompromis strukturave kriminale me vullnetin për ta bërë Shqipërinë një vend armiqësor dhe të parehatshëm për këdo që mund të pasurohet në kurriz të të tjerëve.

“Sot kjo qeveri ka kuptuar se çfarë rreziku përfaqëson krimin i organizuar për përparimin ekonomik për prosperitetin e qytetarëve. Krijimi i Task-Forcës speciale është një tregues i marrjes së përgjegjësive politike dhe ligjore, në luftë kundër krimit të organizuar. Pa sigurinë publike nuk mund të ketë progres ekonomik, ndaj ne do të bëjmë te pamundurën për të përdorur çdo mjet demokratik për të fituar luftën me krimin. Nuk duhet të lejojmë që në ekonomi të depërtojnë paratë e krimit. Sot ka të dhëna që fuqia ekonomike e këtyre grupeve kriminale është e madhe. Te dhënat dëshmojnë injektimin e parave të pista në ekonomi, kemi shartim me grupet e caktuara ekonomike, apo ekonomive fasadë. Disa nga këto grupe synojnë që fuqinë ekonomike ta përdorin me ndikim të tërthortë ose të drejtpërdrejtë në media.”, tha Xhafaj.

Gjithashtu, ministri Xhafaj kërkoi një reformim të shpejtë strukturor në shërbimin hetimor në policinë e shtetit që me kohë të tregohen rezultatet.

“Muajt e fundit kemi pasur sekuestrim të parave të krimit në disa operacione konkrete. Kështu le ti kthejmë këto fitore të vogla në fitore të mëdha dhe të qëndrueshme. Krijimi i Task-Forcës Speciale është vetëm fillimi i një rruge që do të ndryshojë rrënjësisht situatën e krimit.”

Ambasadorja e BE Romana Vlahutin tha se në Shqipëri nuk mund të ketë njerëz të paprekshëm dhe njerëz që blenë drejtësinë. Në prezantimin e operacionit “Forca e Ligjit”, Vlahutin tha se partnerët ndërkombëtarë nuk mund të bëjnë punën e autoriteteve shqiptarë, por thjesht do ndihmojnë.

“Qytetarëve të Shqipërisë u ka ardhur në majë të hundës nga këto dekada arrogance të të korruptuarve dhe grupeve të kriminalizuara të cilët besojnë se Shqipëria ekziston për të pasuruar ata dhe se ata nuk i detyrohen shtetit apo ndokujt tjetër.

Këta njerëz që shesin Atdheun për shtëpinë janë pak, ata nuk kanë pikë turpi, nuk kanë pikë morali dhe nuk kanë respekt për këtë vend që i dha jetën. Shumica e madhe e shqiptarëve sot me të njëjtën qartësi si para tre dekadash ka të njëjtin objektiv: Ta jetojnë jetën e tyre me dinjitet ashtu siç bëjnë të gjithë ne Europë.

Ne së bashku kemi kaluar tre vite impenjative për ta bërë të mundur që reforma në drejtësi ti hapë rrugë institucioneve të reja që do të njohin vetëm ligjin. Ligji që është i barabartë për të gjithë. Të mos ketë të paprekshëm, të mos ketë njerëz që blejnë drejtësinë apo që e shfrytëzojnë atë me anë të një telefonate.

Ambasadori Donald Lu deklaroi se “Kolegët e mi që ndihmojnë prokurorinë dhe FBI-ja amerikane janë këtu për tu angazhuar sërish në luftën kundër krimit të organizuar në Shqipëri. Programi ynë për ndihmën ndaj policisë është përgatitur për të pasur një këshilltar ndërkombëtar që do të punojë brenda kësaj task force ndërinstituticionale. Ndihma jonë për prokurorinë dhe policinë do të mbështesë zhvillimin e instituticioneve të reja në luftën kundër krimit të organizuar.

Çfarë presim? Presim që ky plan agres i qeverisë shqiptare të përfundojë me arrestimin dhe ndjekjen penale të disa peshqëve të mëdhenj në fillim të vitit të ardhshëm dhe që ky sukses të vazhdojë në vitin 2018 me  SPAK e BKH. Partnerët ndërkombëtarë të Shqipërisë e presin këtë, populli shqiptar e kërkon dhe e meriton këtë”.

Ndërkohë, Kryeministri Rama nëpërmjet një statusi në facebok u shpreh se lufta me krimin nuk është lojë politike dhe nga ‘lufta’ fiton Shqipëria.

“LUFTA ME KRIMIN NUK ËSHTË LOJË POLITIKE dhe mes qeverisë që lufton krimin e atyre që luajnë politikisht e mediatikisht me krimin për baltosjen e qeverisë, dallimi është i qartë: Nga LUFTA fiton Shqipëria dhe njerëzit e zakonshëm të saj.”

os.de/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.