Prill “i thyer” në importet e Shqipërisë nga Ukraina – Eksportet u rritën, por importet ranë në nivelin 140 milionë lekë!

Konflikti ushtarak në Ukrainë po ndikon ndjeshëm në shkëmbimet tregtare mes dy vendeve, dhe tashmë ka filluar të japë efektet e para. Ajo që konstatohet nga shifrat e tregtisë së jashtme është një ulje e ndjeshme e importeve të Shqipërisë nga Ukraina. Megjithatë, eksportet vijojnë të mbeten në ritme pozitive, edhe pse tradicionalisht nuk kanë qenë në nivele të larta.

Eksportet  

Referuar të dhënave zyrtare të tregtisë së jashtme të publikuara nga Instat, rezulton se në muajin prill të këtij viti, Shqipëria ka eksportuar në Ukrainë mallra në vlerë 28 milionë lekë, duke njohur një dyfishim në krahasim me prillin e vitit të kaluar.

E sa i përket eksporteve në rang 4 mujor, periudha janar-prill, rezulton se Shqipëria ka eksportuar në Ukrainë mallra në vlerë 206 milionë lekë, duke njohur rritje në krahasim me periudhën janar-prill të një viti më parë.

Rritja në eksporte është me 67 milionë lekë më shumë.

Importet

Situata paraqitet ndryshe me importet.

Në prill të këtij viti, Shqipëria importoi nga Ukraina mallra në vlerë 140 milionë lekë, duke njohur përgjysmim në krahasim me një vit më parë.

Megjithatë, në rang 4 mujori, shifrat e importeve qendrojnë më të larta se e njëjta periudhë e një viti më parë.

Në janar-prill 2022, Shqipëria importoi nga Ukraina mallra në vlerë 1.5 miliardë lekë, duke njohur rritje me 400 milionë lekë në krahasim me një vit më parë.

Tendenca e rënies së importeve nga Ukraina nisi menjëherë që në muajin shkurt kur Rusia u fut ushtarakisht në territorin e Ukrainës duke e pushtuar atë.

Mbetet për t’u parë ecuria e konfliktit në Ukrainë dhe ndikimi që mund të ketë në vijim mbi tregtinë që dy vendet kanë. Megjithatë, duhet evidentuar se në kushtet e luftës, vendet që kanë marrëdhënie tregtare me Ukrainën e kanë orientuar tregtinë e tyre drejt vendeve të tjera, duke tentuar të ulin sa më shumë impaktin e luftës dhe pasigurinë që krijon ajo në furnizimin me lëndë për të cilat Ukraina.

Shqipëria importon nga Ukraina  kryesisht drithëra, dru dhe hekur.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.