Princi William bën thirrje ndaj bankave: “Investoni në mbrojtjen e mjedisit. Të luftojmë ngrohjen globale ”
Duka i Kembrixhit u ka kërkuar bankave të “investojnë në mbrojtjen e mjedisit” për të ndihmuar në luftën ndaj ndryshimeve globale të klimës.
Duke folur në një takim të FMN dhe Bankës Botërore, Princi William tha që mbrojtja e natyrës vazhdoi të luante vetëm një pjesë të vogël në luftimin e ngrohjes globale.
Ai tha se investimi në ripyllëzimet dhe bujqësinë e qëndrueshme ishin mënyra “me kosto efektive” për të trajtuar çështjen.
Bankat janë nën presion për të rritur përpjekjet për të ndihmuar në luftimin e ndryshimit të klimës.
Vetëm këtë javë, selia e Barclays në Londër ishte shënjestra e një proteste të organizuar nga grupi aktivist i klimës Extinction Rebellion. Anëtarët mbanin pankarta dhe thyen disa dritare ndërsa ata i bënin thirrje bankës të ndalonte financimin e kompanive të karburanteve fosile.
Duke iu drejtuar bankierëve qendrorë dhe ministrave të financave në takimet pranverore të Fondit Monetar Ndërkombëtar (FMN) dhe Bankës Botërore, duka tha se habitatet natyrore të botës vazhdojnë të bien me një “normë alarmante”.
“Ne nuk mund të shërohemi në mënyrë të qëndrueshme nga koronavirusi, të çrrënjosim varfërinë globale, të arrijmë emisione neto-zero, ose t’i përshtatemi ndryshimit të klimës, pa investuar në natyrë,” tha ai.
Duka tha se investimi në natyrë përbën vetëm një “pjesë të parave që janë shpenzuar në luftën kundër ndryshimit të klimës”.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.