Prioritetet e qeverisë në vitet e ardhshëm/ Strategjia 2020-2022, nga ndryshimi i ligjit mbi tatimit, te harta e zhurmave
Qeveria shqiptare ka përgatitur, duke e publikuar edhe në fletoren zyrtare, strategjinë për integrimin europian për periudhën 2020-2022. Në këtë strategji radhitet performanca dhe prioritetet në çdo fushë, duke analizuar përputhshmërinë me standardet europiane.
Në këtë strategji të re, e cila përmban më shumë se 300 faqe, bien në sy disa risi. E para ndër to i referohet kriterit ekonomik, dhe më saktë tatimit.
“Ligji i ri për tatimin mbi të ardhurat është planifikuar të prezantohet në vitin 2022. Ky ligj do të trajtojë çështje që lidhen me tatimin mbi të ardhurat personale dhe tatimin mbi fitimin duke synuar harmonizimin me ndryshimet ekonomike gjatë viteve të fundit. Gjithashtu, synohet harmonizimi i mëtejshëm i direktivave në fushën e tatimeve direkte”-thuhet më strategjinë e bërë publike.
Pra, në 2022-shin do të mund të kemi një ligj të ri për tatimin mbi të ardhurat. Me aq sa është thënë dhe analizuar gjatë viteve të fundit, me shumë gjasa, ligji i ri do të përpiqet të sjellë tatimin akumulativ.
Një tjetër risi që mund të presim në vitet në vijim i referohet ndryshimit sërish të skemës së ndihmës ekonomike, drejt një skeme më aktive dhe që mundëson riintegrimin shoqëror, nënvizon vetë qeveria.
Ngritja e një task force kundër korrupsionit, krijimi i një harte zhurmash nga ministria e mjedisit dhe turizimit, apo ngirjta e një mekanizmi që të mbrojë konsumatorët nga falimenti apo dalja nga tregu e një operatori, janë gjithashtu risitë e reja që duhet të presim në kuadër të përafrimit me standardet europiane.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.