Pritet dyfishim i kredive për shtëpi – Raporti i “EIB”: Do të rriten nga 20% në 40% të tregut gjatë muajve në vijim

Banka Europiane e Investimeve ka publikuar një raport të zgjeruar për performancën e sektorit bankat në gjysmën e dytë të këtij viti në vendet e Europës qendrore dhe jug-lindore, mes të cilave edhe Shqipëria.

Raporti analizon në mënyrë të zgjeruar ecurinë e këtij sektori në vendin tonë, si dhe jep projeksione për të ardhmen, ndërkohë që përpilohet më formën e anketës.

Aktualisht, kërkesa për kredi për shtëpi zë vetëm 20% të tregut, nën mesataren e vendeve të rajonit. Por ajo që bie në sy është projeksioni për 6 muajt e ardhshëm.

Vetë aktorët e tregut presin që ky segment i kredisë të zërë 40% të tregut, ndërkohë që mesatarja e rajonit do të jetë në rreth 25%.

Këto pritshmëri duket se lidhen ngushtë me ecurinë e tregut të ndërtimit në vend, në një bum të paprecedentë gjatë muajve të fundit. Bankat presin gjithashtu që kërkesa për kredi në valutë të huaj të bjerë nën 40%, nga rreth 60% që ka qenë gjatë 6 muajve të kaluara.

Për kompanitë e mëdha nuk pritet një rritje e kërkesës për hua. “Bankat kanë raportuar një rritje të moderuar si të kërkesës për kredi ashtu edhe kushteve të ofertës. Normat e kredive jo-performuese kanë vazhduar që të bien, por vijojnë të mbeten ndër më të lartat në rajon”, thotë në terma të përgjithshme Banka Europiane e Investimeve, organi zyrtar huadhënës i Bashkimit Europian, ku aksionerë janë të gjitha vendet anëtare të unionit, sa i përket ecurisë së këtij sektori në vendin tonë.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.