Pritet rritje e fluturimeve në Maj. EasyJet ngre optimizmin përpara sezonit të Verës
Linja ajrore britanike, EasyJet, deklaroi se pret të nisë më shumë fluturime nga fundi i muajit Maj, duke larguar shqetësimet mbi valën e tretë të Covid-19 në Europë, që kishte zbehur shpresat e rikthimit të fluturimeve gjatë Verës. EasyJet bëri të ditur se shumica e vendeve planifikojnë të rinisin fluturimet në masë gjatë Majit dhe ti rrisin më vonë gjatë Verës. Kompania bëri të ditur se në tremujorin e dytë do fluturojë rreth 20% të nivelit të kapacitetit të vitit 2019.
Rikthimi i fluturimeve në masë do nxisë financat e linjave ajrore, që janë goditur nga pandemia. Kompania fluturoi vetëm 14% të kapacitetit të 2019-s në tremujorin e parë. Për periudhën gjashtë mujore që përfundoi në Mars, EasyJet pret të raportojë një humbje përpara taksave prej 730 milionë paundë. Kompania theksoi se ka 2.9 miliardë paundë likuiditet dhe se është e mirë pozicionuar për të kapitalizuar rimëkëmbjen e fluturimeve.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.