Privatësia në qendër të vëmendjes – 160 vende të botës marrin vendim për rritjen e bashkëpunimit
Konferenca e 41-të ndërkombëtare e komisionerevë të mbrojtjes së të dhënave personale dhe privatësisë e mbajtur në Tiranë, ka dalë me një marrëveshje të të gjithë vendeve pjesëmarrëse për një bashkëpunim rregullator më të madh, me qëllim garantimin e privatësisë për të gjithë qytetarët e këtyre shteteve.
“Kemi rënë dakord për një qasje ndërkombëtare që tregon një rrugëtim që ne e ndajmë me njëri-tjetrin. Ne të gjithë e dimë që konsumatorët ku do që janë vuajnë njësoj nëse kompanitë e mëdha nuk i përpunojnë siç duhet të dhënat personale.
Ne e dimë që njerëzit, të gjithë bëjnë të të njëjtat pyetje për mbrojtjen e të dhënave personale dhe se çfarë ndikimi ka teknologjia në të dhënat e tyre.
Ne, ramë dakord që të punojmë më shumë për të ndarë përvojat me njëri-tjetrin dhe ta ndihmojmë njëri-tjetrin në gjëra më të detajuara,” u shpreh Elisabeth Denham, Presidente e Komitetit Ekzekutiv.
Konferenca u përshëndet edhe nga Kryeministri Edi Rama, i cili theksoi se pavarësisht se është bërë progres nga vendi ynë në këtë drejtim, sërish nevojitet ekspertiza e shteteve të tjera për ta çuar në një tjetër nivel mbrojtjen e të dhënave personale.
“Pavarësisht se jemi në një moment tjetër dhe kemi ecur përpara, gjithsesi ky vend është ende vulnerabël dhe e vlerësoj ekspertizën që ky rrjet sjell sepse gjithçka ka të bëjë me njohuritë. Ne jemi të ndërgjegjshëm që kemi ende shumë për të mësuar dhe kjo është pjesa më e rëndësishme e asaj hapje që po bëjmë drejt botës.” u shpreh ai.
Kjo konferencë është aktiviteti kryesor i profesionistëve të fushës së privatësisë në shkallë botërore, me pjesëmarrjen e 700 delegatëve nga 160 autoritetet anëtare dhe vëzhguese nga të gjithë kontinentet, nga fusha e biznesit, bota akademike dhe e medias.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.