“Privilegjet” për spitalet private – Qeveria i’u shton gamën e shërbimeve, mund të ofrojnë dhe spital ditor!
Qeveria ka vendosur të shtojë gamën e shërbimeve që japin spitalet private, duke ju dhënë mundësi që të ofrojnë edhe shërbimin spitalor ditor. Përmes një vendimi të miratuar në datën 11 dhjetor, te kriteret që sanksionojnë hapjen dhe mbylljen e spitaleve është përcaktuar se ndërtesa e spitalit ditor mund të jetë e përfshirë në ndërtesën e spitalit publik në një ose disa reparte të dedikuara të spitalit publik apo jopublik.
Vendimi përcakton edhe kriteret që duhet të përmbushen nga pikëpamja infrastrukturore apo e personelit. Spitali ditor përfshin çdo ndërhyrje kirurgjikale apo procedurë invasive, diagnostikuese apo terapeutike të pacientëve nën anestezi të përgjithshme, lokale, apo sedacion, të cilët shtrohen dhe dalin nga spitali brenda së njëjtës ditë, sipas një plani shtrimi paraprak. Ndërkoh që, kjo formë e ndihmës arrihet nga mjeku specialist i kontraktuar me kohë të plotë ose të pjesshme.
Ky vendim, vjen pas nxjerrjes për konsultim publik të një projektligji nga ana e Ministrisë së Shëndetësisië dhe Mbrojtjes Sociale, mbi reformimin e gjithë sistemit spitalor në vend, por që parashikon një sërë priviliegjesh të tjerë për spitalet privatë. Sipas draftit, këto institucione shëndetësore do të kenë mundësi të përfitojnë fonde publike për shërbime të ofruara në formën e paketave shëndetësore apo nëpërmjet partneritetit publik privat. Aktualisht, përmes një vendimi qeverie shteti financon 10 paketa shëndetësore në 5 spitale private, por nuk kanë munguar kritikat për kostifikimin e tyre apo ekspozimi i pacientëve ndaj pagesave, ndonëse parashikohet që ato të jenë 100% falas.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.