Procedurat tenderuese – APP “shtrëngon” institucionet: Të njoftoni për çdo ndryshim në kontratë
Brenda harkut kohor të një jave Agjencia e Prokurimit Publik ka nxjerrë 2 udhëzime, që tërheqin vëmendjen e institucioneve publike dhe operatorëve ekonomikë mbi formën sesi prokurojnë apo zbatojnë kontratat e lidhura pas kryerjes së procedurës tenderuese.
Referuar një njoftimi me datë 12 qershor, të gjithë institucionet shtetërore që prokurojnë me fonde publike do të duhet të raportojnë pranë Agjencisë së Prokurimit Publik, në çdo rast kur ka ndryshime në kontratë gjatë zbatimit ose në përfundim të saj.
Ky ndryshim vjen pas akuzave të shpeshta, që janë cilësuar edhe si shkelje e barazisë në tendera për shkak të ndryshimeve të kryera pas nënshkrimit të kontratës. Ndërkohë që, pak ditë më parë ky dikaster ndryshoi rregullat për prokurimet me vlerë të vogël për shkak të ofertave të papërgjegjshme nga ana e operatorëve ekonomikë.
Sipas APP-së operatorët ekonomikë nuk përllogarisnin ofertat e tyre në bazë të nevojave që autoritetet kontraktore kanë për mallra apo shërbime, por vetëm mbi vlerën e prokurimit.
Për këtë arsye, tashmë operatorët nuk do të njihen me fondin limit, por vetëm me objektin e prokurimit dhe sasinë e kërkuar nga autoriteti. Këto ndryshimeve vijnë pak kohë pasi Komisioni parlamentar i Ekonomisë adresoi kritika të forta mbi transparencën dhe deformimin e konkurrencës së ndershme si pasojë e praktikave korruptive.
I njëjti komision ngriti shqetësimin se aktualisht nuk ka asnjë institucion që kontrollon dhe vlerëson sesi zhvillohen procedurat tenderuese dhe sesi shpenzohen paratë publike.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.