Procesi mësimor nën rregullat e covid-19 – Binjaku: Si të përgatisni fëmijët për të ruajtur shëndetin, pa i ngarkuar psikologjikisht 

Procesi i ri mësimor do të zhvillohet nën rregullat e vendosura nga Ministria e Arsimit dhe ajo e Shëndetësisë, me qëllim frenimin e përhapjes së COVID-19. Por, teksa nxënësit janë të detyruar t’i zbatojnë, psikologët japin disa këshilla sesi prindërit dhe mësuesit duhet të sillet me fëmijët, për të mos i ngarkuar psikologjikisht.

Psikologia, Entela Binjaku thotë për TV SCAN se rolin kryesor në këtë situatë e kanë prindërit dhe mësuesit, të cilët duhet të tregohen të kujdesshëm në drejtim të informacioneve që i përcjellin fëmijëve.

Sipas psikologes, nuk është domosdoshmëri që nxënësit të dinë çdo detaj mbi ecurinë e epidemisë në vend, ndërsa rekomandon që informacioni rreth COVID-19 të mos jepet çdo ditë.

Po në rastet kur mund të kemi raste të konfirmuar me COVID-19 në një klasë apo shkollë? Për psikologun, shmangia e stigmatizimit është domosdoshmëri.

Ndërkaq, nisur nga situate aktuale, Binjaku thotë se është i nevojshëm të shtohet numri i psikologëve në shkolla. Sipas saj, aktualisht ndodh një një psikolog mund të mbulojë deri në 9 shkolla, çka e bën të pamundur ofrimi e shërbimit për të gjithë nxënësit.

Sipas protokolleve të miratuar, në hyrje të shkollës nxënësit duhet të mbajnë distancë 1.5 m, duhet të jenë të pajisur me maskë ose mbrojtëse të fytyrës prej tekstili si dhe shami letre për higjienën e hundëve. Megjithatë, mbajtja e maskës gjatë mësimit për nxënësit e ciklit të ulët 9-vjeçar është vetëm e rekomandueshme, ndërsa për ciklin e lartë 9-vjeçar dhe të mesëm maska është detyrim. Edhe në klasa distance do të jetë 1.5 m, ndërkohë që nuk do të lejohen të dalin nga ambientet e shkollës dhe të rikthehen përsëri.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.