Prodhimi i energjisë nga era – MIE pranon 4 aplikime për parqe eolike, fuqia totale e instaluar 12 MW

Pas një numri të lartë aplikimesh për ndërtimin e parqeve fotovoltaike, investitorët duket se po tregojnë interes edhe për parqet eolike, duke mundësuar prodhimin e  energjisë nga era. Ministria e Infrastrukturës dhe Energjisë ka pranuar aplikimin e 4 kompanive, të cilat kanë shprehur interes për të ndërtuar parqe me kapacitet 3 MW, duke arritur një kapacitet total të instaluar prej 12 MW.

3 prej impianteve parashikohet të ndërtohen në zonën e Pilurit, në Bashkinë e Himarës, ndërsa impianti i katërt në Tropojë të Fierit. Megjithatë, do të jetë Enti Rregullator i Energjisë ai që duhet të kryejë licencimet përfundimtare për t’i hapur rrugën ndërtimit të tyre. Pak kohë ma parë Këshilli i Ministrave ka miratuar masat mbështetëse për nxitjen e  përdorimit të energjisë së prodhuar nga era e dielli, duke synuar arritjen e objektivit të përcaktuar në Planin Kombëtar të Veprimit për Burimet e Rinovueshme të Energjisë. Referuar vendimit, garantohet kontrata për blerjen e energjisë elektrike të prodhuar, me një kohëzgjatje maksimale për 15 vjet, duke filluar nga data e dhënies së certifikatës së përdorimit të projektit .

Ndërsa më herët ERE ka përcaktuat se çmimi i blerjes për energjinë e prodhuar nga era do të jetë 76 euro/mw. Zbatimi i këtyre projekteve do të ishte një hap i rëndësishëm në drejtim të diversifikimit të burimeve të energjisë në Shqipëri, që aktualisht është i varur në masën 100% nga burimet hidrike, duke bërë që vendi të humbasë miliona euro në periudha thatësirash.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.