Prodhimi industrial në Eurozonë – Investimet e korporatave rrisin treguesin për muajin Korrik
Prodhimi industrial në Eurozonë është rimëkëmbur lehtë në Korrik, pas një rënieje të fortë në Qershor, nxitur kryesisht nga investimet e korporatave dhe mallrave të qëndrueshme të konsumit.
Prodhimi në total u rrit me 0.1% nga muaji i kaluar, tregojnë të dhënat e Eurostat, krahasuar me një rënie prej 0.6% në Qershor.
Pavarësisht rritjes së lehtë, shifra mbi outputin sjell optimizëm për ekonominë e Eurozonës në gjysmën e dytë të vitit, pasi rritja e prodhimit erdhi kryesisht nga mallrat kapitale ,duke konfirmuar ndjesinë pozitive të bizneseve. Të dhënat e korrikut mbi prodhimin vijnë pas përshpejtimit të rritjes ekonomike në 0.6% në tremujorin e dytë.
Eurostat bëri të ditur se investimet në mallrat kapitale, si makineritë, u rritën me 0.8% gjatë muajit, duke përbërë rritjen më të lartë në komponentët. Prodhimi i mallrave të qëndrueshëm të konsumit, si makinat, u rrit gjithashtu me 0.7%, ndërkohë që firmat projektojnë kërkesë më të lartë nga konsumatorët.
Rritja e limituar në treguesin përfundimtar erdhi prej rënies së pjerrët të prodhimit në energji me 1.2%. Rritja mujore ishte në linjë me projeksionet e analistëve, ndërsa treguesi vjetor, në 3.2% erdhi poshtë pritshmërive prej 3.4%.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.