Prodhimi industrial në Itali rritet me 1.6% gjatë 2016, sinjale për ekonominë
Prodhimi industrial në Itali regjistrohet në një rritje mbi pritshmëritë gjatë Dhjetorit, tregojnë të dhënat e fundit. Shifrat sinjalizojnë një rritje edhe më të madhe ekonomike në fundvit. Prodhimi industrial gjatë Dhjetorit u rrit kështu me 1.4%, pasi u rrit me vetëm 0.8% gjatë muajit Nëntor, tregojnë të dhënat e institutit italian të statistikave.
Në terma tremujorësh ndërkohë, gjatë tre muajve të fundit, prodhimi industrial u rrit me 1.3% në krahasim me atë paraardhës. Industria italiane është rimëkëmbur ndjeshëm gjatë gjysmës së dytë të vitit të kaluar, duke ndjekur trendin e sektorit në tërësi në kontinent.
Ky sektor me shumë gjasa do të kontribuojë në rritjen e ekonomisë së tretë më të madhe në Eurozonë. Sa i përket rritjes ekonomike gjatë tremujorit të fundit të vitit, nuk ka ende të dhëna zyrtare. Për të gjithë vitin 2016, qeveria vlerëson paraprakisht një rritje në 0.8%.
Që prej vitit 2008, kohë kur shpërtheu edhe kriza financiare globale, prodhimi industrial në Itali ka rënë me një të katërtën, dhe gjatë dy viteve të fundit ka rifituar vetëm një pjesë të vogël të humbjeve. Gjatë vitit të kaluar, prodhimi u rrit me 1.6% duke shënuar rritjen më të madhe që prej 2010-ës, kur raportonte një normë në 6.7%.
Roel Korkuti/RTV SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.