Produkte pa vulë dhe certifikatë veterinare – AKU asgjëson 60 kg mish dhe 565 kg ushqime

Trupat inspektuese të Autoritetit  Kombëtar të Ushqimit kanë kryer gjatë 24 orëve të fundit 432  inspektime dhe monitorime si pjesë e Task-Forcës Anti-Covid.

AKU bën me dije se në çdo monitorim nga Task-Forca kërkohet që të zbatohen protokollet e sigurisë, higjienizimi i ambienteve, mbajtja e maskave në ambiente të mbyllura, si dhe ruajtja e distancës fizike në çdo subjekt, si mjete kryesore për kufizimin e përhapjes së virusit.

Sipas njoftimit gjatë inspektimeve janë dhënë dy masa administrative në operatorë të biznesit ushqimor. Një masë administrative është dhënë në një subjekt për mungesë të kushteve higjieno-sanitare. Në një subjekt tregtim mishi është bërë bllokimi i një sasie prej 60 kg mish qengji pa vulë dhe certifikatë veterinare, për rrjedhojë është vendosur edhe masë administrative ndaj këtij subjekti, si dhe bllokim aktiviteti.

Gjithashtu me kërkesë të një subjekti është kryer proceduara e asgjësimit të një sasie prej 565 kg produkte ushqimore si dhe referuar Planit të Marrjes së Mostrave janë marrë 23 mostra, kryesisht në monitorim të qumështit dhe në fruta-perime për analizim të mbetjeve pesticide.

Autoriteti Kombëtar i Ushqimit vazhdon pandërprerë punën në terren në garantim të sigurisë  ushqimore dhe mbrojtjes së shëndetit të konsumatorit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.