Produkte të pasigurta për konsum – AKU asgjëson rreth 90 ton ushqime dhe vendos 20 masa administrative në 24 orët e fundit

Autoriteti Kombëtar i Ushqimit në kuadër të garantimit të sigurisë ushqimore ka kryer gjatë 24 orëve të fundit 247 inspektime dhe monitorime në kuadër të Planit Vjetor dhe si pjesë e Task-Forcës kundër përhapjes së COVID-19.

Sipas njoftimit referuar konstatimeve gjatë kontrolleve janë vendosur 20 masa administrative “paralajmërim” si dhe janë asgjësuar 87.5 ton produkte ushqimore me kërkesë të vetë subjektit, duke mbajtur kështu pastër tregun nga produkte të papërshtatshme për konsum.

AKU bën me dije se siguria dhe cilësia e produkteve sezonale është në vëmendjen e veçantë të organit, ndaj edhe gjatë 24 orëve të fundit janë marrë 42 mostra për kryerjen e analizave laboratorike.

“AKU është çdo ditë në punë, për të mbrojtur shëndetin dhe jetën e secilit konsumator si dhe duke siguruar produkte të shëndetshme në tavolinat e çdo familjeje,” shkruhet në njoftim.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.