Profili i huamarrësit shqiptar – Banka Kombëtare e Austrisë: 50% e tyre zotëron një shtëpi të dytë

Banka Kombëtare e Austrisë ka publikuar një raport të detajuar për vendet e Europës Qendrore dhe Jug-lindore, me titull: “Fokusi në integrimin ekonomik europian T1, 2019”.

Ndër vendet e marra në analizë është edhe Shqipëria. Veç disa indikatorëve ekonomikë, raporti bën krahasim mes vendeve të marra në analizë edhe në disa indikatorë makrofinanciarë. Kreditimi është një ndër to, dhe të dhënat që dalin në pah nga studimi në formë ankete janë mjaft interesante. Shifrat tregojnë se, familjet shqiptare janë ato më pak borxhliet ndër vendet e rajonit, të paktën ndaj institucioneve huadhënëse.

Norma e borxhit për familjet shqiptare fiksohet në  pak më shumë se 11% të Prodhimit të Brendshëm Bruto të vendit e që siç duket qartë nga grafiku 1, është norma më e ulët në rajon. Për vende si Polonia ngjitet deri në 34%, pra thuajse tre herë më e lartë. Edhe në terma të tjerë, pra jo në krahasim me PBB, borxhi i familjeve shqiptare rezulton të jetë më i ulëti në rajon, siç e tregon edhe grafiku 2.

Raporti analizon edhe ata që e kanë këtë borxh, duke parë gjendjen financiare të tyre. Popullsia është grupuar në 3 kategori, ku e para është ajo më e varfër, e treta ajo më e pasur, dhe e dyta, ajo që ne i referohemi edhe me shtresa e mesme. Rezulton se, 44% të huasë e ka shtresa më e pasur e popullsisë, 35% shtresa e mesme dhe vetëm 21% e ka shtresa më e varfër e popullsisë. Të varfrit shqiptarë janë borxhlinjtë e katërt më të mëdhenj në rajon, me ngjyrën blu në grafikun 3.

Ajo që bie tjetër në sy nga të dhënat është fakti se, 50% e shqiptarëve që marrin hua për shtëpi nëpër institucionet huadhënëse zotëron një shtëpi ose pronë të dytë. Në krahasim me rajonin, kjo është padiskutim norma më e lartë. Për disa vende të rajonit, kjo normë zbret deri në 20%.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.