Prognoza/ Testi 10 minutësh për COVID-19 që kushton 1 dollarë mund të jetë një “game changer”
Me pak burime dhe pak staf, autoritetet po garojnë të përmbajnë përhapjen e COVID-19 në Afrikë, e cila përbën 1% të shpenzimeve globale të shëndetit, por mbart 23% të barrës së sëmundjeve, përfshirë qindra mijëra vdekje çdo vit nga malarja, HIV / AIDS dhe tuberkulozi.
Tridhjetë e gjashtë nga 54 vendet e kontinentit kanë aftësinë të testojnë për koronavirusin, por një rritje masive në raste mund të mposhtë shërbimin shëndetësor atje. Kryeministri i Etiopisë Abiy Ahmed tha të dielën se nënshkroi një partneritet me miliarderin kinez Jack Ma, për të shpërndarë 20,000 tampona testi dhe 100,000 maska për çdo vend afrikan, si dhe libra udhëzues për sëmundjen.
Më vete, Qendrat e Afrikës për Kontrollin dhe Parandalimin e Sëmundjeve me qendër në Etiopi presin të shpërndajnë 200,000 teste në të gjithë kontinentin javën e ardhshme, kryesisht nga TIB Molbiol GmbH me qendër në Berlin, sipas shefit të laboratorit të grupit, Yenew Kebede.
“Nuk ka mungesë të testeve laboratorike në Afrikë, por ajo që ne duam është një test më i shpejtë dhe më i lirë për të konfirmuar shpejt nëse ka një shpërthim të virusit, në mënyrë që ta përmbajmë virusin para se të bëhet një shqetësim më i madh,” tha Rosanna Peeling, kryetare e Hulumtimit të Diagnostikimit në London School të Higjenës dhe Mjekësisë Tropikale.
Këtu hyn në lojë Mologic. Përdorimi i teknologjisë nga testet mobile të shtatzanisë dhe testet e malaries, kompleti i saj i pështymës dhe gishtave mund të jetë gati për shitje deri në qershor për më pak se 1 dollarë. Në Afrikë, ata do të prodhohen në Senegal nga diaTropix, një strukturë diagnostikimi e krijuar rishtazi, e drejtuar nga drejtori i Institutit Pasteur, Amadou Alpha Sall, i cili ka udhëhequr trajnimet përreth kontinentit për testimin e koronavirusit.
“Ne po sigurojmë që këto teste të bëhen të shitshme me koston e prodhimit,” tha Joe Fitchett, drejtori mjekësor i Mologic, i cili mori një grant prej 1.2 milion dollarë nga qeveria britanike për të zhvilluar testin.
Testet aktuale Covid-19, të njohura si teste PCR, zbulojnë materialin gjenetik të patogjenit në një proces laboratorik që mund të zgjasë disa orë dhe të kushtojë mbi 400 dollarë.
Megjithëse përhapja e virusit ka qenë relativisht e ngadaltë në Afrikë, numri i pacientëve u ngjit javën e kaluar në Egjipt, Senegal dhe Afrikën e Jugut, duke e çuar numrin e përgjithshëm të rasteve në pothuajse 200 në më shumë se 20 vende, me shumicën e pacientëve që kishin udhëtuar së fundmi në Evropë.
Mologic dhe Instituti Pasteur kanë një kapacitet të përbashkët për të prodhuar 8 milion teste në vit dhe planifikojnë t’i shesin ato drejtpërdrejt në qeveritë afrikane, si dhe Aleancën Globale për Vaksina dhe Imunizim dhe OBSH. Mologic po kërkon të sigurojë një strukturë prodhuese për të prodhuar një shtesë prej 20 milion testesh në vit, fillimisht për SHBA dhe më vonë për Afrikën.
Trajnimi i stafit po rritet gjithashtu. Pesëmbëdhjetë laboratorë afrikanë morën udhëzime muajin e kaluar nga instituti Senegalez për të diagnostikuar virusin, ndërsa trajnime shtesë u mbajtën në Afrikën e Jugut për kurimin e tij.
“Një test i shpejtë mund të ndryshojë tërësisht rrjedhën e ngjarjeve për ne,” tha Ihekweazu, duke shtuar se simptoma e malarjas, e cila është e përhapur në Afrikë, mund të komplikojë dhe prekjen nga COVID-19.
Dosti Banushi – SCAN
Burimi: Bloomberg
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.