Programi i praktikave të punës – MMSR: Shtyhet afati për aplikime, deri në 20 gusht
Ministria e Mirëqenies Sociale dhe Rinisë ka shtyrë afatin e aplikimit për t’u bërë pjesë e Programit Kombëtar të Praktikave të Punës.
Burime pranë këtij dikasteri thanë për TV SCAN se të rinjtë e moshës 21-26 vjeç do të kenë mundësi të aplikojnë deri në datën 20 gusht, ndërkohë që deri në datën 27 korrik u regjistruan 1046 aplikime.
Në total MMSR ka shpallur 1343 pozicione për praktikantë në 19 Institucione shtetërore qendrore, 93 Institucione të varësisë, 19 Njësi të Qeverisjes Vendore si dhe 10 Shoqëri Tregtare.
Kjo është edhe risia e thirrjes së tretë të këtij program pasi janë përfshirë edhe bizneset private, që u ofrojnë mundësi të rinjve për të kryer praktikën e më konkretisht: bankat e nivelit të dytë apo kompanitë celulare.
Programi do të zgjasë 3 muaj dhe është pa pagesë, por pavarësisht kësaj, periudha e praktikës do të njihet si përvojë pune gjatë rekrutimit në institucionet e administratës publike.
Aplikimi mund të bëhet vetëm online, në faqen e dedikuar nga Ministria e Mirëqenies Sociale praktika.sociale.gov.al, ndërsa të drejtën e kanë të gjithë të rinjtë që kanë mbaruar minimalisht ciklin e parë të studimeve bachelor, jo vetëm nga Shqipëria, por edhe nga Diaspora.
E rëndësishme është që para aplikimit, të konsultoni numrin dhe profilin e kërkuar nga çdo institucion qendror, vendor apo privat në mënyrë që të konsideroni probabilitetin e përzgjedhjes.
Ndërkohë që, nëse aplikoni më shumë se një herë, do të skualifikoheni. Përzgjedhja do të kryhet nga institucionet për të cilat është kryer aplikimi bazuar në profilin apo kriteret e përcaktuara nga institucioni.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.