Programi i Rindërtimit/ Sa do të ndërtohet? Sa kredi do të merren? Sa përfiton ekonomia shqiptare? Përgjigjet e kryeministrit
Viti 2020 do të jetë viti i rindërtimit të banesave individuale të dëmtuara nga tërmeti i 26 nëntorit të vitit të kaluar. Ndërsa viti 2021, do të jetë viti i ndërtimit të blloqeve të reja të banimit. Kjo u bë e ditur nga kryeministri Edi Rama ku u prezantuan modelet e rindërtimit për familjet e prekura që kanë humbur shtëpinë në fshat që hyjnë në fazën e garës ndërkombëtare për kompanitë që do të ndërtojnë banesat individuale. Punimet do të nisin në pranverë (maksimumi në qershor).
“Për shtëpitë në pjesën dërrmuese, do t’i kemi të ngritura dhe njerëzit do të kalojnë vitin e ri aty. Sa i përket blloqeve, ato janë pak më të komoplikuara se bëhet fjalë për ndërhyrje masive por besoj se të gjitha kantieret do të mund të ngrihen brenda këtij viti dhe brenda 2021 pjesa tjetër. 2020 është viti i familjeve që kanë humbur shtëpitë individuale, 2021 viti i familjeve që kanë humbur apartamentin që do t’ua lënë vendin godinave të reja” tha kryeministri.
I pyetur nga gazetarja e SCAN Elisabeta Dosku nëse do të përdoren kreditë e ofruara në konferencën e donatorëve, kryeministri tha se nga shuma 1.1 miliardë euro do të përdoren të gjitha fondet që do të nevojiten për këtë proces.
“Ne vazhdojmë punën sepse të gjitha gjërat i kemi me radhë dhe nuk e di a kemi fonde për t’i mbuluar të gjithë dhe do të marrim nga ajo shumë të gjitha ato që na nevojten.Kreditë janë super të favorshme por jo domosdoshmërisht do na duhet e gjithë shumë në këtë faze. Kështu që gjëja me rëndësi është se nuk kemi asnjë problem për të mbuluar financiarisht këtë rindërtim që po bëjmë” tha kryeministri. Kryeministri tha se programi nuk do të ndikojë në rritjen e borxhit publik dhe as do të ketë ndryshim të kufirit ligjor të marrjes hua.
Sa i përket efekteve që mund të ketë ky proces në ekonomi, kryeministri tha se fondi 1.1 miliardë euro që u ofrua në Konferencën e Donatorëve është një mundësi e re,që sëbashku me goditjen e pasurisë së krimit që krijon liri, do të krijojë mundësinë për një ekonomi me potencial të çliruar dhe investimet e huaja shkojnë në një nivel shumë më të lartë sesa mesatarja e viteve të fundit.
SCAN
#TiNukDoJeshKurrëVetëm🤗👐🏿🇦🇱Kryeministri – Ja MODELET E RINDËRTIMIT për familjet e prekura që kanë humbur shtëpinë në fshat që hyjnë në fazën e garës ndërkombëtare për kompanitë që do të ndërtojnë banesat individuale🏡🏘🏠
Posted by Edi Rama on Friday, February 28, 2020
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.