Progres në bisedimet SHBA-Kinë – Trump: Po shkojnë tmerrësisht shumë mirë
Presidenti amerikan, Donald Trump u shpreh se bisedimet tregtare me Kinën po shkojnë tmerrësisht shumë mirë dhe se Shtetet e Bashkuara të Amerikës janë shumë afër të pasurit një marrëveshje tregtare të vërtetë me Pekinin, që i shkon për shtat kompanive amerikane. “Tarifat po e dëmtojnë Kinën shumë rëndë.
Ata nuk i duan ato dhe sinqerisht, nëse ne mund ta bëjmë marrëveshjen, do ta kisha për nder t`i hiqja ato”-deklaroi Donald Trump gjatë një eventi në Shtëpinë e Bardhë. Presidenti amerikan do të takohet me homologun e tij kinez pasi të përmbyllen negociatat teknike mes dy vendeve. Delegacionet e të dy vendeve do të takohen në Washington. “Disa prej marrëveshje do t`i bëjmë ne të dy mes njëri-tjetrit”-shtoi Trump.
Ndër të tjera numri një i Shtëpisë së Bardhë deklaroi se, po mendon që të thërrasë edhe një delegacion nga Partia Demokrate për bisedimet me Kinën. Përpos çështjes me Kinën, Trump shtoi se Shtetet e Bashkuara janë duke bërë progres edhe për një marrëveshje me Mbretërinë e Bashkuar. Me daljen nga Bashkimi Europian, Britanisë i duhet të nënshkruajë marrëveshje të reja me secilin shtet të botës.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.