Projekt i ri për shëtitoren “Taulantia” – Ja çfarë duhet të përfshijë

Shëtitorja “Taulantia” do të kthehet së shpejti në një park qendror për qytetin e Durrësit, duke i dhënë tërësisht një pamje të re. Bashkia Durrës ka hapur tenderin me vlerë 6.6 milionë lekë për rehabilitimin e kësaj shëtitoreje.

Sipas saj, projekti duhet të përfshijë më shumë hapësira publike për qytetarët, sheshe, hapësira të gjelbëruara e të ndriçuara. Po ashtu, pjesë e tij duhet të jenë edhe parqe për aktivitete sportive si dhe lojëra për fëmijë.

Sa i takon këtyre të fundit, Bashkia parashikon ndarjen të grupuar sipas moshës, referuar fëmijëve nga mosha 1 deri në 15 vjeç, sipas nënndarjeve të grupmoshave.

Po ashtu, përmes këtij projekti duhet të krijohen lidhje të forta me hapësirën urbane të cilës i referohet dhe me qendrën. Rikualifikimi i kësaj zone sipas kërkesave të Bashkisë pritet të krijojë edhe një raport të ri të qytetarëve me detin, ku parashikohet një dizajn unik përgjatë rrugës e cila të lejon të afrohen ë mënyrë të vazhdueshme.

Një tjetër kërkesë e Bashkisë parashikon që pranë “Sheshit Mol”, të bëhet ndërtimi i hapësirave të veçanta për spektakle dhe evenimente të vogla, duke e bërë kështu këtë një zonë multifunksionale të rëndësishme jo vetëm për qytetarët e Durrësit, por edhe për turistët.

Afati kohor për dorëzimin e ofertave nga operatorët e interesuar është data 26 mars 2018, ndërsa kohëzgjatja e kontratës është përcaktuar 150 ditë nga firmosja e saj.

Genta Dobra/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.