Projekt në zonën Tiranë-Durrës – Shqipëria krijon për herë të parë hartat digjitale
Shqipëria ka krijuar për herë të parë hartat digjitale topografike të standardeve bashkëkohore, që i vijnë në mbështetje zhvillimit të qëndrueshëm dhe afatgjatë sektorëve ekonomiko-socialë të vendit.
Qeveria shqiptare në bashkëpunim me qeverinë e Japonisë, nisur nga 2017, përmes Agjencisë Japoneze të Bashkëpunimit Ndërkombëtar (JICA), kanë mbështetur Autoritetin Shtetëror për Informacionin Gjeohapacin (ASIG), për të zbatuar “Projektin për Informacionin Gjeohapësinor dhe Zhvillimin e Qëndrueshëm të Tokës në Zonën Tiranë-Durrës”.Sipas njoftimit, projekti synon të përmirësojë kapacitetin e stafit të ASIG dhe të prodhojë hartën digjitale topografike (1:2000) në zonat e Tiranës dhe Durrësit.Projekti mundësoi në 2018 për ASIG-un një sërë pajisjesh për hartografinë digjitale, në shumën prej 300.000 euro, të tilla si kompjuterë, softuerë të hartave, ekrane, printerë laser me ngjyra për printimin e hartave digjitale.
Gjithashtu, stafi i ASIG është specializuar përmes trajnimit të përditshëm në vendin e punës dhe kurseve të trajnimit gjeo-hapësinor në Japoni.JICA dhe ASIG, si pjesë e aktivitetit për përmirësimin e kapaciteteve njerëzore, organizuan në kryeqytet një sesion trajnimi për studentët e Fakultetit të Inxhinierisë Civile të Universitetit Politeknik të Tiranës.Stafi i ASIG dhe ekspertët japonezë, duke përdorur pajisjet e softuerët e prokuruara nga Projekti, si dhe njohuritë e fituara përmes trajnimit u mësuan studentëve se si të prodhojnë harta digjitale topografike. Aktiviteti në fjalë gjithashtu u mundësoi studentëve të përdorin teknologji të përparuara për kapjen e të dhënave, si dhe të shfrytëzojnë informacionin gjeohapësinor dhe teknikat për hartimin e hartave topografike digjitale.
Sipas njoftimit në aktivitet morën pjesë ambasadori i Japonisë në vendin tonë Makoto Ito, përfaqësuesi rezident i Zyrës së Ballkanit të JICA, Hideya Kobayashi, si dhe Drejtori i Përgjithshëm i ASIG, Lorenc Çala, të cilët vlerësuan këtë proces me impakt të drejtpërdrejtë në zhvillimin e vendit.
“Shumë punë janë realizuar gjithashtu, verifikimet në terren tashmë kanë përfunduar, janë prodhuar fotografitë e para ajrore të Tiranës dhe të Durrësit dhe është krijuar një mostër e hartave topografike digjitale” – citohet të ketë thënë Ambasadori i Japonisë në vendin tonë Makoto Ito. Njoftimit bëri me dije se 10 anëtarë të stafit të ASIG kanë zhvilluar trajnime në Japoni gjatë dy viteve të fundit, në përpjekje për të rritur kapacitetet e këtij institucioni dhe për të plotësuar nevojat e popullsisë shqiptare që jetojnë në zonat e Tiranës dhe Durrësit.
“Përmes këtij hapi të ndarjes të njohurive dhe eksperiencave tona me studentët e Fakultetit të Inxhinierisë Civile të Universitetit Politeknik i Tiranës, ne shpresojmë t’u ofrojmë këtyre profesionistëve të ardhshëm një mundësi për të kuptuar më mirë këto pajisje dhe këtë teknologji, që në të ardhmen ata të jenë në gjendje të përgatisin në mënyrë të pavarur harta topografike digjitale”, -theksoi ai. Ndërsa përfaqësuesi rezident i Zyrës së Ballkanit të JICA, Hideya Kobayashi u shpreh se, “me ndihmën dhe angazhim të fortë e bashkëpunimit nga stafi i shkëlqyeshëm i ASIG, dhe Qeveria e Shqipërisë, deri tani, JICA dhe ASIG kanë zbatuar me sukses projektin për krijimin e hartave topografike digjitale.
“Japonia ka një marrëdhënie të gjatë dhe miqësore me Shqipërinë dhe ka mbështetur qeverinë dhe popullin shqiptar për më shumë se 20 vjet, për zhvillimin e mëtejshëm të vendit dhe krijimin e komuniteteve më të shëndetshme dhe më të begata,”– tha ai. Në përfundim të aktivitetit, përfaqësuesi Rezident i Zyrës së Ballkanit të JICA-s,
Kobayashi, i dorëzoi simbolikisht Drejtorit të Përgjithshëm të ASIG-ut, Lorenc Çala, pajisje dhe softuerë, të dhuruar ASIG-it, në kuadër të këtij projekti. JICA po mbështet përmes këtij projekti ASIG në rritjen e kapaciteteve teknike dhe njerëzore, si dhe transferon njohuritë përkatëse për hartografinë topografike digjitale. Në përfundim, Drejtori i Përgjithshëm të ASIG-ut, Lorenc Çala e vlerësoi historike krijimin e hartave digjitale që përbëjnë një revolucion në shërbim të zhvillimit shumëdimensional të vendit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.