Projekt strategjia e rishikuar e Diasporës, si do të përfshihen “të ikurit” në zhvillimin ekonomik të vendit!
Agjencia Kombëtare e Diasporës ka hedhur për Konsultim Publik projekt strategjinë e rishikuar, për Diasporën. Kjo e fundit paraqet, ndër të tjera, përfshirjen e diasporës në zhvillimin ekonomik të vendit.
Fushat në të cilat do të përqendrohet kjo përfshirje janë krijimi i një Dhome Tregtie Biznesi të Diasporës, ofrimi i një kuadri ligjor për investimet nga Diaspora dhe ngritjen e një Skeme Bashkërendimi dhe Rrjetëzimi të Profesionistëve të Diasporës.
“Për më tepër, do të inkurajohet përthithja e investimeve të diasporës, krijimi i ndërmarrjeve të vogla e të mesme në disa fusha, përfshirë bujqësinë, industrinë e ushqimit dhe zhvillimin e zonave rurale.
Me anën e Strategjisë Kombëtare do të punohet për të krijuar një klimë të favorshme për investimet nga diaspora nëpërmjet aktiviteteve për stimuj fiskalë, shpërndarje informacioni, duke ulur korrupsionin, risqet, apo duke përmirësuar elementë të tjerë që e bëjnë të mundur klimën e investimeve” shkruhet më tej në projekt strategjinë e rishikuar.
Po ashtu, strategjia cilëson bashkëpunimin e ngushtë me Kosovën, si një element shumë të rëndësishëm për realizimin e objektivave të mësipërme.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.