Projektbuxheti 2022 për Policinë e Shtetit – Çuçi dhe Nano njoftojnë rritje pagash dhe investim në infrastrukturë

Gjatë ditës së sotme është prezantuar projektbuxheti i vitit 2022 për Policinë e Shtetit.

Në fjalimin e tij, Drejtori i Përgjithshëm i Policisë Gledis Nano tha se do të ketë rritje pagash, modernizim dhe investime në infrastrukturë.

“Prej më shumë se 4 vite është aplikuar marrja me qira e mjeteve të transportit rrugor që konsiderohet si modeli më efektiv, nisur nga avantazhet financiare dhe operative. Fondet për investime me financim të brendshëm për herë të parë me rritje me 81%, 550 milion lekë më shumë krahasuar me vitin aktual.

“Do të financohen objekte dhe blerje pajisje speciale për policinë kriminale, teknologjinë e informacion dhe policinë shkencore. Vetëm për rinovimin e sistemit të transmetimit datacom do të bëhet e mundur ndërlidhja e 85% të strukturave. Do të vijojë rinovimi i armatimit”, tha Nano.

Ndërsa Ministri i Brendshëm, Bledi Çuçi u shpreh se për sa i përket investimeve në infrastrukturë disa komisariate vendore do të konstruktohen.

Çuçi u shpreh se Komisariatet vendore të Policisë në Elbasan, Dibër, Sarandë dhe Pika e Kalimit Kufitar të Qafë Botës, do të rikonstruktohen plotësisht, duke ofruar shërbim me standarde të tjera për qytetarët dhe ambiente pune të përshtatshme për punonjësit e policisë.

“Përveç teknologjisë do të realizojmë edhe investime në infrastrukturë. Komisariatet vendore të Policisë në Elbasan, Dibër, Sarandë dhe Pika e Kalimit Kufitar të Qafë Botës, do të rikonstruktohen plotësisht për të qenë në nivelet bashkëkohore, duke ofruar shërbim me standarde të tjera për qytetarët dhe ambiente pune të përshtatshme për punonjësit e policisë”, tha Çuçi.

Çuçi gjithashtu ka bërë të ditur se parashikohet të jepet shpërblim për punonjësit e policisë që punojnë larg vendbanimit të tyre.

Ministri u shpreh se ky bonus, i cili do nisë të jepet prej janarit të vitit të ardhshëm, shkon deri në 150% të pagës aktuale, por është në varësi të largësisë së vendbanimit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.