Projektet infrastrukturore – BEI 700 mln euro për Ballkanin Perëndimor në 2018

Banka më e madhe e zhvillimit të Europës po planifikon të financojë rreth 700 milionë euro për vitin 2018 projektet në përmirësimin e infrastrukturës dhe rritjen e lidhjeve të transportit ndërmjet vendeve të Ballkanit Perëndimor.

Banka Europiane e Investimeve (BEI), por përdor depozitat e shteteve anëtare të BE-së si siguri për të financuar hua në projekte kërkimore, infrastrukturore dhe mjedisore në Evropë dhe në mbarë botën.

“Ne po planifikojmë rreth 700 milionë euro për projektet e infrastrukturës, energjisë dhe transportit në Ballkanin Perëndimor në 2018”, tha zëvendëspresidenti i BEI, Vazil Hudak për Reuters.

Hudak tha se BEI do të vazhdojë të përqendrohet te ndërmarrjet e vogla dhe të mesme, si dhe do të vazhdojë bashkëpunimin me autoritetet publike dhe gjithashtu do të mbështesë turizmin dhe digjitalizimin e Ballkanit Perëndimor.

BEI është institucioni ndërkombëtar më aktiv në rajonin e Ballkanit Perëndimor me miratimin e kredive, duke arritur në 8 miliardë euro gjatë 10 viteve të fundit.

“BEI ka qenë shumë aktive në rajon dhe ne besojmë se është e rëndësishme të mbështeten këto vende për t’u rimëkëmbur ekonomikisht”, u shpreh Hudak, duke shtuar se banka gjithashtu është e gatshme të trajtojë sfida afatgjata të tilla si ndryshimet klimatike.

Bullgaria, e cila mori presidencën e radhës në BE në janar të këtij viti, ka deklaruar se do të nxisë më shumë projekte për të ndihmuar vendet e Ballkanit Perëndimor që të afrohen me bllokun.

Ndërkohë, Sofja do të presë në një samit të BE-së në maj të këtij viti udhëheqësit e 6 vendeve të Ballkanit Perëndimor.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.