Projekti “Bëjmë detyrat e shtëpisë” – Nikolla: Vitin tjetër do të shtrihet në të gjithë shkollat e vendit
Projekti “Bëjmë detyrat e shtëpisë” do të zgjerohet më tej vitin e ardhshëm duke u bërë pjesë pothuajse në të gjitha shkollat e vendit. Lajmin e ka bërë të ditur ministrja e Arsimit, Sportit dhe Rinisë, Lindita Nikolla gjatë turit të llogaridhënies në qytetin e Memaliaj.
Sipas ministres, projekti pilot ka shënuar arritje të reja tek nxënësit që janë pjesë e tij.
“Ka rezultuar një nismë e mirëpritur nga prindërit dhe ka shënuar progres tek nxënësit. Ne kemi bërë një testim përpara se ta fillonin këtë projekt dhe do ta masim sërish progresin e nxënësve dhe besoj që vitin e ardhshëm ne do ta fusim në sistem në më shumë shkolla ose në të gjitha shkollat e Shqipërisë.”
Lidhur me shqetësimin e disa banorëve për klasat kolektive, Nikolla u shpreh se problemi po adresohet duke grupuar klasat kolektive. Por, ajo ka shtuar më tej se kjo nuk do të prekë mësuesit që janë në sistem.
“Edhe nëse një shkollë duhet të mbyllim disa klasa për t’i dërguar nxënësit në një shkollë tjetër në mënyrë që të mësojnë në klasa normale, mësuesit do të jenë në sistem.”
Më tej, Nikolla u ndal edhe te reforma që po ndërmerr ministria për rritjen e notës mesatare mbi 9-të për maturantët që duan të ndjekin programet e mësuesisë, duke shtuar se do të nisë zbatimin që këtë vit.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.