Projekti “Bibliotekat e Lagjeve si Qendra Multifunksionale” – Kush mund të marrë pjesë, kriteret dhe afati i fundit për aplikim
Bashkia e Tiranës ka lançuar projektin “Bibliotekat e Lagjeve si Qendra Multifunksionale” me qëllim rritjen e frekuentimit dhe vëmendjes së qytetarëve ndaj bibliotekave.
Ky projekt, i cili konsiston në përdorimin e ambienteve të bibliotekave nga organizata jofitimprurëse parashikon shtimin e qendrave rinore dhe hapësirave multifunksionale për të rinjtë e Tiranës si dhe zhvillimin e ideve kreative dhe inovative.
Formimi i të rinjve duke i larguar nga fenomenet negative si duhani, bullizmi apo droga është edhe një ndër objektivat kryesorë të këtij projekti që do të vijë si një bashkëpunim i Bashkisë së Tiranës me organizatat jofitimprurëse.
Për t’u bërë pjesë e projektit, të gjitha organizatat jofitimprurëse mund të aplikojnë pranë Bashkisë së Tiranës përmes një formulari aplikimi. Këtë të fundit mund ta shkarkoni nga faqja zyrtare e Bashkisë në adresën www.tirana.al.
Ndërkohë, të interesuarit duhet të plotësojnë një sërë kriteresh për të aplikuar, që përfshijnë:
1- Formularin e aplikimit të plotësuar në mënyrë të plotë dhe të saktë ( të firmosur dhe vulosur);
2- Projekt Propozimi dhe kalendarin e aktiviteteve duhet të parashikojnë periudhën një vjeçare;
3- Vendimi i Gjykatës, Statuti i Shoqatës, Akti i themelimit dhe NIPT (Kopjet, duhet të jenë të noterizuara), Vërtetim për statusin e aplikuesit e tërhequr tek e-Albania;
4- Vërtetim nga Gjykata, që Shoqata, Fondacioni, nuk është në proces falimentimi apo likuidimi.
5- CV e organizatës
6- Dokument identifikimi i aplikuesit ( fotokopje e kartës ID të Drejtuesit Ekzekutiv të shoqatës)
Kohëzgjatja e projekt-propozimeve është parashikuar të jetë 12 muaj, ndërsa 30 prill 2018 është edhe afati i fundit për dorëzimin e tyre pranë Protokollit të Bashkisë së Tiranës. Projekti parashikon shtrirjen në bibliotekat e lagjeve në të gjitha Njësitë Administrative të Bashkisë së Tiranës.
Bashkia e Tiranës gjatë muajve të fundit po investon për restaurimin e bibliotekave në lagje, duke i kthyer ato në hapësira me pamje moderne.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.