Projekti i Rrugëve Lidhëse Rajonale – Prioritet turizmi dhe tregjet bujqësore. FSHZH, 125 mln lekë për përgatitjen e projekteve teknike

Fondi Shqiptar i Zhvillimit ka nisur tashmë hapat e parë për përgatitjen e Projektit të Rrugëve Lidhëse Rajonale në Shqipëri. Ky projekt, i cili është mbështetur me një kredi prej 100 milionë eurosh nga Banka për Ndërkombëtare për Rindërtim dhe Zhvillim, synon të përmirësojë një sërë segmentesh rrugore me interes për të gjithë vendin.

Siç bën vetë të ditur FSHZH, përzgjedhja e rrugëve ku do të ndërhyhet nuk do të përqendrohet në bazë të ndarjes gjeografike. Rrugët do të zgjidhen mbi bazën e një disa kritereve me anë të një procesi rigoroz për të optimizuar ndikimin ekonomik.

Kështu, përparësi do të kenë rrugën që lidhin me zona me potencial turistik, si dhe ato që krijojnë akses më të lehtë për në tregjet bujqësore. Pra, me shumë gjasa nuk do të ketë një “subvencionim” nga ana e shtetit për ato zona ku investimi nuk do të kthehet sërish pas në ekonominë e brendshme.

Nën siglën e Projektit të Rrugëve Lidhëse Rajonale do të përmirësohen rreth 100 kilometra rrugë, mbështetur edhe mbi përvojën e marrë nga projektet e mëparshme të financuara nga Banka Botërore.

Ndër punimet e parashikuara përfshihen: zgjerimi dhe asfaltimi i rrugëve e bankinave, stabilizimi i argjinaturave, riparime dhe ndërtime të urave të ndryshme, ndërtimi i bypass-eve, si dhe plotësimi me elementët e sigurisë e sinjalistikës rrugore.

Për përgatitjen e projekteve teknike të rrugëve të përfshira në vitin e parë të financimit, Fondi Shqiptar i Zhvillimit ka hapur edhe garën për shërbimin e konsulencës.

Fondi limit i caktuar për këtë shërbim është 125 milionë lekë, ndërsa kontrata që do të lidhet me institucionit dhe operatorit fituese do të ketë një kohëzgjatje prej 24 muajsh.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.