Projekti i tunelit të Llogarasë – Gati përzgjedhja e studios projektuese, Balluku: Në fund të vitit, tenderi për ndërtimin
Përzgjedhja e kompanisë që do të projektojë tunelin e Llogarasë po shkon drejt finalizimit, teksa 2 konsorciume të huaja kaluan fazën e parakualifikimit mes 7 pjesëmarrëve në garë. 2 studiot projektuese kanë prezantuar propozimet e tyre mbi Metodologjinë e Punës dhe Zgjidhjet teknike, ndërkohë që të mërkurën do të shpallet fituesi që do të hartojë projektin e plotë. Ndërkaq, Ministrja e Infrastrukturës dhe Energjisë, Belinda Balluku theksoi rëndësinë e kohës së shkurtër të projektimit, duke synuar që në fund të vitit të hapet tenderi për përzgjedhjene kompanisë që do të ndërtojë veprën.
Balluku tha se realizimi i këtij projekti të rëndësishëm infrastrukturor, shkurton kohën e udhëtimit drejt jugut të vendit, duke ndikuar drejtpërdrejt në zhvillimin e turizmit.
Tuneli i Llogarasë do të ketë një gjatësi prej 6 km, ndërsa do të shkurtojë kohën e aksesimit të jugut të vendit me rreth 45 minuta. Më herët, qeveria ka deklaruar se nga zbatimi i këtij projekti pritet që impakti direkt në punësim të jetë 400 vetë, ndërsa ai indirekt shkon në 10 mijë persona.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.