Projektligji në Kuvend/1 mld lekë për ish-të dënuarit politikë, kategoritë që përfitojnë
Qeveria shtyn afatet ligjore të dorëzimit të dokumentacionit për ish-të dënuarit politik deri në fund të këtij viti. Rreth 320 ish-të dënuar politik të cilët kanë paraqitur kërkesën për përfitimin e dëmshpërblimit financiar në Ministrinë e Drejtësisë pas përfundimit të afateve ligjore, me projektligjin e ri futen në skemën e dëmshpërblimeve.
Projektligji i hartuar nga Ministria e Drejtësisë, Ministria e Financave, Ministria e Mirëqenies Sociale dhe Rinisë si dhe Instituti për Integrimin e ish-të përndjekurve, ka mbërritur në Kuvendin e Shqipërisë dhe së shpejti pritet të hyjë në axhendën e komisioneve parlamentare.
Efektet financiare të projektligjit në buxhetin e shtetit që lidhen me dëmshpërblimin e ish-të dënuarve politikë të kategorisë parësore, llogariten në vlerën e rreth 919 milionë lekëve, ndërsa efektet financiare të projektligjit, vetëm për 1 këst, përllogariten rreth 115 milionë lekë.
Qeveria argumenton në relacionin përkatës se objektiv i këtij projektligji është shtyrja e afatit ligjor për paraqitjen e kërkesave për dëmshpërblim deri në datën 31 dhjetor të këtij viti, duke u krijuar mundësinë për përfitimin e dëmshpërblimit financiar për ish-të dënuarit që kanë vuajtur dënimin gjatë regjimit komunist dhe janë ende në jetë, por që deri tani, nuk kanë mundur të përfitojnë dëmshpërblim për shkak se nuk kanë aplikuar brenda afatit ligjor të parashikuar, i cili ka qenë 1 korriku i vitit 2009.
Nga ana tjetër, projektligji nuk përmban asnjë dispozitë që ndalon rivendosjen në afat të trashëgimtarëve të ish-të dënuarve të politikë, në çdo kohë kur një gjë e tillë do të vlerësohet e mundshme për t’u realizuar.
Nga ky projektligj përfitojnë ish-të dënuarat politike gra, që jetojnë në momentin e dhënies së pagesës; ish të dënuarit politikë, që jetojnë në momentin e dhënies së pagesës dhe që kanë moshën mbi 75 vjeç me hyrjen në fuqi të këtij ligji; ish-të dënuarit, të cilët vuajnë nga sëmundje të rënda, sipas përcaktimit të aktit nënligjor të posaçëm; ish-të dënuarit politikë që jetojnë në momentin e dhënies së pagesës, të cilët, pavarësisht nga mosha, kanë pasardhës të radhës së parë në moshë të mitur etj.
Florenc Drizari/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.