Projektligji i ri/ Sanksione për pronarët që dëmtojnë pasuritë kulturore – Muzetë do t’i nënshtrohen procesit të akreditimit

Këshilli i Ministrave ka depozituar pranë Kuvendit projektligjin “Për trashëgiminë kulturore dhe muzetë”, i cili zëvendëson legjislacionin aktual dhe forcon dispozitat për realizimin e objektivave në këtë fushë.

Ndryshimet prekin sidomos bashkëpunimin privat-shtet në mirëmbajtjen e objekteve të pasurive të paluajtshme, ku deri më sot është shteti që ka financuar për restaurimin e objekteve në pronësi private.

Ligji i ri vendos detyrime për pronarët që të mbajnë në gjendje të mirë pasuritë kulturore, duke njoftuar autoritetet përkatëse për çdo dëmtim. Në rast të shkatërrimit të kësaj pasurie si arsye e mospërmbushjes së detyrimeve si pronarë, shteti ka të drejtë të vendosë sanksione. Gjithashtu, pronari është i detyruar të kontribuojë financiarisht për ndërhyrjet ruajtëse dhe mbrojtëse, në të kundërt mbi pronën kulturore vendoset një barrë ligjore me vlerën e shpenzimit.

Projektligji reformon strukturën institucionale përgjegjëse për ruajtjen dhe zhvillimin e trashëgimisë kulturore. Kemi një shtim të kompetencave dhe funksioneve të institucioneve ekzistente të ligjit aktual në fuqi, por edhe ngritjen e institucioneve si Inspektorati Kombëtar për Mbrojtjen e Trashëgimisë Kulturore (aktualisht IKMT).

Në projektligj është përfshirë  edhe koncepti “i akreditimit” të muzeve, i cili përcakton nëse muzeu dhe aktiviteti i tij përmbushin standardet e caktuara të cilësisë, edukimit, sigurisë, ruajtjes së  vlerave kulturore. Akreditimi është një proces që kryhet periodikisht çdo 5 vjet, ndërsa muzetë publikë kanë një afat prej 5 vitesh që të plotësojnë kriteret.

Gjithashtu shtohen koncepte dhe klasifikime të reja të pasurive kulturore, si folklori muzikor instrumental, lojrat popullore, ritualet dhe spektaklet kulturore. Baza ligjore i përafrohet edhe më tepër asaj të Bashkimit Europian, ndërsa fushat që mbrohen nga konventa ndërkombëtare, si pasuria nënujore, tashmë përfshihen edhe brenda paketës ligjore.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.