Prokurimet me vlerë të vogël, APP: Të skualifikohen operatorët që nuk përputhen në fushën e veprimtarisë

Agjencia e Prokurimit Publik ka lëshuar një udhëzim për të gjithë autoritetet kontraktore në lidhje me procedurat e prokurimit me vlerë të vogël.

Tashmë, gjatë procesit të vlerësimit të ofertave, do të vendoset edhe një kriter i ri për operatorët ekonomikë (bizneset ofertuese). Veprimtaria e këtyre të fundit duhet të ketë si objekt edhe mallin apo shërbimin e kërkuar, në të kundërt oferta do të refuzohet automatikisht nga komisioni i prokurimit.

P.sh.: nëse prokurimi ka si objekt blerjen e ushqimeve, por operatori ekonomik ka të shënuar si veprimtari vetëm shitjen e artikujve shkollorë, atëherë ai skualifikohet.

Verifikimi do të kryhet përmes faqes zyrtare të Qendrës Kombëtare të Biznesit, në hapësirën e ekstraktit të veprimtarisë së subjektit.

Megjithatë APP bën thirrje që kjo të mos bëhet shkak për abuzime, për skualifikimin e padrejtë të operatorëve ekonomikë. Në rast se fusha e veprimtarisë është më e gjerë se objekti që prokurohet, psh. kur operatori merr pjesë në një procedurë prokurimi me objekt “Blerje tavolinë zyre” dhe ka si objekt të veprimtarisë “Pajisje zyre”, ky operator ekonomik nuk mund të skualifikohet.

Pra autoritetet kontraktore duhet të mbajnë në konsideratë se objekti i prokurimit duhet të jetë i përfshirë në fushën e veprimtarisë dhe jo domosdoshmërisht të jetë i njëjtë me të.

Çdo skualifikim i padrejtë i operatorëve ekonomike në lidhje me verifikim e fushës së veprimtarisë do të monitorohet nga APP.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.