Prokuroria e Kushtetuesja ankohen për fonde – Kërkojnë më shumë buxhet për investime në vitin 2020
Prokuroria e Përgjithshme dhe Gjykata Kushtetuese janë të pakënaqura me buxhetin e akorduar për vitin 2020.
Fillimisht kërkesat për shtesa në fonde janë parashtruar nga përfaqësues të Prokurorisë, përballë deputetëve të Komisionit Parlamentar për Çështjet Ligjore , me argumentin se me buxhetin e ri shkurtohen 60 vende punonjës, janë ulur shpenzimet operative dhe është ulur fondi për investime.
Ky institucion ka kërkuar rishikimin e këtyre treguesve dhe 5-fish më shumë për investime, kërkesa që janë rrëzuar.
Ndërkaq, edhe Gjykata Kushtetuese ka shfaqur pakënaqësi, duke kërkuar para për rikonstruksionin e godinës, me argumentin se është dëmtuar dhe plasaritur për shkak të tërmeteve. Por që sërish nuk është pranuar.
Dy institucioneve u është kërkuar që të rakordohen sërish me Ministrinë e Financave dhe të Ekonomisë, nëse ka hapësira për të riparë fondet e akorduara.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.