Promovimi i turizmit – Ngrihet rrjeti i blogerave shqiptarë. 200 personalitete misionarë
Turizmi në vendin tonë tashmë do të promovohet edhe përmes rrjetit të blogerave shqiptarë. Nisma më e fundit e Ministrisë së Turizmit dhe Mjedisit synon të krijojë një fushatë të gjerë promovuese në rrjetet sociale përmes figurave të spikatura të vendit tonë në botë. Kjo nismë u lancua nga kreu i turizmit Blendi Klosi në eventin “Oda Shqiptare”.
“Jemi këtu për një qëllim shumë të thjeshtë; të bëhemi bashkë. Vendet me tradita turistike, e kanë një nga armët më të forta të promovimit të vlerave kombëtare, përmes emrave të njohur të vendeve të tyre. Kjo është ajo që duam të bëjmë të gjithë bashkë. Themelimin e rrjetit shqiptar të turizmit, nga Oda e traditave shqip”, tha ministri.
Klosi u kërkoi mbi 200 personaliteteve të pranishëm në event në fushën e artit, kulturës, biznesit dhe politikës shqiptare e në rajon që të shpërndajnë përmes teknologjisë, vlerat natyrore historike e kulturore të vendit tonë në mbarë botën.
“Një klikim i juaj, në profilet tuaja, i një fotoje, videoje apo share, nga bregdeti, Alpet, Tirana, Berati, Gjirokastra, natyra, gatimi apo histori Shqipërie, ka efektin e më shumë se dhjetëra panaireve, takimeve zyrtare apo parave të shpenzuara për promovim. Kjo është një e mirë që ju mund t’ia bëni Shqipërisë, turizmit shqiptar. Ngritja e rrjetit të blogerave shqiptarë, nismën që lançojmë sot, që dikush mund ta quajë patriotike apo pragmatike, është vetëm në të mirë të vendit tuaj, vendit tonë të përbashkët”, tha Klosi.
Kjo është iniciativa e radhës sipas Klosit për ta bërë Shqipërinë konkurruese duke ecur në drejtim të lehtësirave për investime strategjike, për ngritje të hoteleve dhe resorteve me 4 dhe 5 yje, si dhe miratimin e 100 fshatrave të parë turistikë, për të investuar dhe shndërruar në destinacione të mirëfillta turistike në kuadër të “Rilindjes rurale”.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.