Pronarët “e pësojnë” nga pandemia – Ministria e Drejtësisë shkurtoi me 5 milionë dollarë fondet për kompensim financiar
Ndërsa thuajse të gjithë programet e Ministrisë së Drejtësisë kanë pësuar shkurtime për shkak të vështirësive financiare të shkaktuara nga Pandemia Covid 19, kategoria e pronarëve është ajo që ka regjistruar edhe uljen më të madhe të fondeve. Scan Televizion ka zbardhur raportin e monitorimit të treguesve financiarë të Ministrisë së Drejtësisë për tetë muajt e parë të vitit, nga i cili rezulton se për shkak të Pandemisë, Dikasteri ka shkurtuar me rreth 7 milionë dollarë shpenzimet. Buxheti fillestar I miratuar në fund të vitit 2019 prej 10.8 miliardë lekësh, është ulur në 10.1 miliardë lekë me Aktin Normativ të 2 Korrikut.
Shkurtime kanë shënuar thuajse të gjithë programet. Nga të dhënat e Ministrisë rezulton se në programin “Planifikim, Menaxhim dhe Administrim” janë pakësuar 93 milionë lekë, rreth 900 mijë dollar, ndërkohë që në programin “Ndihma Juridike” janë pakësuar 30 milionë lekë.
Shkurtime kanë shënuar edhe Programet për “Publikimet Zyrtare”, “ Mjekësia Ligjore”, “Shërbimi i Përmbarimit Gjyqësor”, apo “Shërbimi për Çështjet e Birësimeve”. Ndërkohë që ka qenë program “Shërbimi i Kthimit dhe Kompensimit të Pronave” që ka pësuar shkurtimin më të fortë prej 530 milionë lekësh, afërisht 5 milionë dollarë.
I vetmi program që ka shënuar rritje buxheti është ai i Shërbimit të Provës, fondet për të cilin janë rritur me rreth 400 mijë dollar gjatë tetë muajve të parë të vitit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.