Pronarët, kompensimi sipas zërit të ‘45 – Agjencia e Pronave: I kemi kursyer shtetit 3 miliardë lekë në 2018, dhe 1.8 miliardë në 2019

Ligji i ri për trajtimin e pronave, i cili i kompenson pronarët jo me vlerën reale të tokës, por me zërin kadastral që ka pasur në vitin 1945, i ka kursyer buxhetit të shtetit miliarda lekë, Agjencia e Trajtimit të Pronave ka raportuar në mënyrë të përmbledhur vlerat financiare që duhet të ishin dhënë për kompensimin e pronarëve nëse vlerësimet do të ishin bërë me ligjin e vjetër të kthim-kompensimit të pronave.

Sipas të dhënave zyrtare, në vitin 2019 I janë kursyer buxhetit të shtetit 1.8 miliardë lekë, të cilat në të kundërt do të kishin përfunduar në llogaritë e pronarëve në formën e kompensimit financiar. Ndërkohë që efektet e vërteta të ligjit të ri janë ndejrë në vitin 2018, kur buxhetit të shtetit i janë kursyer plot 3 miliardë lekë.

Gjithësesi, efektet e vërteta të Ligjit të ri të Trajtimit të Pronave do të ndihen në vitet e ardhëshme, duke parë se fatura e kompensimit është llogaritur nga Agencia në vlerën e 1 Miliardë dollarëve, ndërkohë që sipas shoqatave të pronarëve vlera reale e faturës është të paktën 4 miliardë dollarë.

Një situatë e tillë nuk mund të mos përkthehet në përplasje gjyqësore mes Agjencisë dhe pronarëve.

6,950 pronarë pritet t’i drejtohen gjykatave për të paditur Agjencinë e Trajtimit të Pronave në vijim pasi kërkesat e tyre nuk kanë marrë përgjigje nga kjo e fundit. Shifra bëhet e ditur nga vetë Agjencia e Trajtimit të Pronave në raportin e punës për katër muajt e parë të vitit 2020.

Trendi i fortë në rritje i padive ndaj Agjencisë së Trajtimit të Pronave është verifikuar gjatë muajve të verës.

Vetëm gjatë muajit korrik, Agjencia raporton 99 padi ndaj saj për ndjekje në Gjykata, ndërkohë që mbi 60 të tjera kanë vijuar gjatë muajit gusht. Ndërkohë përgjatë gjitha vitit 2020, arrin në rreth 600 numri i padive të reja nga ana e pronarëve ndaj Agjencisë së Trajtimit të Pronave.

Një numër shumë i madh padish të ngritura nga pronarët presin prej vitesh nëpër gjykata, veçanërisht në atë të Lartën. Ndërkohë që sipas parashikimeve, paditë do të vijojnë për shkak të shifrave shumë të larta që pretendojnë pronarët nga shteti.

Deri në fund të vitit 2019 janë shqyrtuar në total mbi 26 mijë dosje pronarësh, ndërkohë që shifra prej 1 miliardë eurosh i korrespondon afërsisht 18 mijë vendimeve për kompensim.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.