Pronat, 80 padi te Administrativja – Në gjykatë për anulim apo rishikim të vendimeve të ATP
Në vitin 2017 rreth 80 qytetarë i janë drejtuar Gjykatës Administrative për të zgjidhur problemet me pronat. Në paditë kundër Agjencisë së Trajtimit të Pronave, ata kundërshtojnë vendimet e këtij institucioni lidhur me njohjen e pasurive, kompensimin fizik e financiar, apo rrëzimin e vendimeve të mëparshme të komisioneve të kthimit të pronave apo të vetë Agjencisë.
Një pjesë e mirë e padive kërkojnë anulimin apo rishikimin e vendimeve për kthim-kompensim të marra nga Agjencia e Trajtimit Pronave.
Disa kërkojnë korrigjimin e masës së kompensimit financiar, por edhe dëmshpërblim për dëmin e shkaktuar duke bërë përllogaritjen sipas indekseve te çmimeve të INSTAT apo sipas Vendimeve të Këshillit të Ministrave lidhur me çështjen e pronave.
Ka dhe pronarë që kërkojnë rishikimin e pronave të prekura nga procesi i legalizimit të ndërtimeve pa leje.
Nga viti 2015, po zbatohet ligji i ri për trajtimin e pronës. Ligji u debatua ashpër nga shoqatat e ish pronarëve, veçanërisht për shkak të formulës së re të kompensimit, e cila e llogarit vlerën e pronës me zërin kadastral që ka pasur në vitin 1945.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.