Pronat, ATP heq detyrimin për hartat shoqëruese – Nuk do përcaktohen më me vendim gjykate. Do përfitojnë mbi 8 mijë pronarë

Pronarët nuk do të kenë më detyrimin të paraqesin hartat shoqëruese të sipërfaqeve për të fituar të drejtën e kthimit apo kompensimit të pronave, gjë që deri më sot bëhej me vendim gjykate. Vendimi është marrë nga Agjencia e Trajtimit të Pronave, në vazhdën e detyrimeve që ka përcaktuar gjykata e Strasburgut për shtetin shqiptar përsa i përket procesit të kthim kompensimit.

Në terma praktikë, kjo sjell heqjen e detyrimit të hartave shoqëruese në fazën e ekzekutimit të vendimeve për rastet kur prona është zënë nga liqenet artificiale dhe kur prona është vlerësuar me vlerë financiare nga ish komisionet. Nga këto ndryshime, thekson vetë Agjencia e Trajtimit të Pronave, do të përfitojnë rreth 8049 subjekte të cilat kanë mungesë të hartës. Gjatë fazës së ekzekutimit të vendimeve të gjithë subjektet janë të detyruar të dorëzojnë hartën e vendimit pasi më parë duhet të drejtoheshin në gjykatë për ta ribërë këtë.

Ndërkaq, mes të tjerash, Strasburgu ka detyruar qeverinë shqiptare të kompensojë pronarët me të paktën 10% të vlerës aktuale të tokës dhe jo me zërin kadastral që ka pasur në vitin 1945 do të sjellë rillogaritjen e  faturës për më shumë se 10 mijë subjekte. Agjencia e Trajtimit të Pronës njofton se brenda afatit 3 mujor të vitit 2021 do të kryhet përllogaritja e vlerës financiare  me  shtimin  e  saj  me  10%  të  vlerës  sipas  zërit  kadastral  aktual  sipas  rekomandimeve të GJEDNJ. Nga këto ndryshime do të preken afërsisht 10,120 subjekte që vlera fillestare e vlerësimit do të rishikohet me qëllim vetëm për të përfituar më tepër.

Fatura financiare që do të përfitojnë më tepër pronarët  parashikohet    të  jetë  afërsisht  18.2  Mld  lekë, afërisht 180 milionë dollarë, thekson në raport Agjencia e Trajtimit të Pronave.  Kjo  vlerë e  shtuar  financiare  mbetet  dhe mbulohet brenda fondit total prej 50 Mld lekë të parashikuar në ligjin nr. 133/2015.2. nga ana tjetër, vendimet e kompensimit që do të ekzekutohen do të indeksohen me normën e interesit nga momenti i plotësimit të dokumentacionit deri në momentin e ekzekutimit. Çdo  vendim  përfundimtar do  të  rillogaritet  duke  i  dhënë  dhe  indeksimin  e  normës  së  interesit  nga momenti i plotësimit të dokumentacionit sipas formularit deri në momentin e ekzekutimit.

Ndërkaq, Agjencia parashikon kompensimime 100%  (cash)  për vendime me vlerë financiare deri në 1.500.000 lekë. Si rezultat  i këtyre  ndryshimeve,  bëhet  e  mundur  që  të  aplikojnë  dhe  përfitojnë  10 085  subjekte,  të  cilët  do  të kompensohen financiarisht me vlerë financiare të plotë. Me këtë ndryshim do të kompensohen rreth 60 % e vendimeve nga 18 730 që janë gjithsej.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.