Pronat nga kreditë – Vlera në bilancet e bankave arrin në 25 mld lekë

Vlera e pasurive të paluajtshme që bankat kanë marrë në zotërim në përfundim të procesit të ekzekutimit të kolateralit ka arritur në mbi 25 miliardë lekë. Në pesë vitet e fundit, vlera e këtyre pasurive në bilancet e bankave është rritur me afërsisht pesë herë. Sipas të dhënave nga Banka e Shqipërisë, ato përbënin 2.1% të totalit të aktiveve të sistemit bankar në fund të vitit 2017.

Marrja në zotërim e aseteve të lëna si kolateral ndodh zakonisht në rastet kur nuk është e mundur të gjendet një blerës përmes ankandeve për shitjen e tyre. Pas rritjes së shpejtë të kredive me probleme, bankat u përballën gjithnjë e më shpesh me nevojën për të kërkuar mbledhjen e kredive përmes ekzekutimit të kolateralit.

Por, kriza në ekonomi dhe në tregun e pronave shumë shpesh e ka bërë të vështirë shitjen e pronave. Kjo vlen sidomos për kolateralet në vlera të mëdha të bizneseve, si për shembull toka apo prona komerciale. Për shkak të vlerës së madhe të pronave dhe spektrit më të kufizuar të blerësve potencialë, gjithnjë e më shumë bankat janë detyruar t’i marrin vetë në posedim këto prona.

Rritja e peshës së tyre në bilancet e bankave e ka bërë menaxhimin e tyre një sfidë më vete. Veç problemeve dhe kostove të menaxhimit, këto prona rëndojnë shpenzimet në bilanc, sepse bankat janë të detyruara të mbajnë fonde rezervë për to. Për pasuritë e paluajtshme, vlera e provigjioneve fillon nga 5% në vitin e parë deri në 100% në vitin e shtatë të mbajtjes së tyre në bilanc. Minimalisht, për një vlerë pronash prej 25 miliardë lekësh, përllogaritet se bankat kanë shpenzuar rreth 1.25 miliardë lekë provigjione vitin e kaluar. Realisht, shifra duhet të kenë qenë më e lartë, sepse një pjesë e madhe e këtyre pronave qëndrojnë në bilancet e bankave prej më shumë se një viti.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.