Pronat turistike, zbardhet vendimi – Klosit i kalohen 148 pasuri qindra hektarë në Divjakë, Karpen, Durrës

148 sipërfaqe në pronësi shtetërore, të pozicionuar në vijën bregdetare Shkodër-Fier i janë kaluar Ministrisë së Turizmit në funksion të investimeve në këtë sektor.  Kalimi në administrim të Ministrisë së Turizmit i sipërfaqeve që shtrihen në qindra hektarë në disa prej zonave më të kërkuara turistike në vend është miratuar nga Këshilli i Ministrave më 21 nëntor, vetëm pak ditë përpara se Kreu i Qeverisë Edi Rama të bënte publike qëllimet e ekzekutivit për këtë sektor.

Në vendim, në fakt, specifikohet se sipërfaqet nuk mund të tjetërsohen apo të jepen në përdorim te të tretët nga Ministria dhe se mund të përdoren vetëm për investime në sektorin e turizmit. “Ministrisë përgjegjëse për turizmin i ndalohet të ndryshojë destinacionin e përdorimit të pronave të paluajtshme, sipas pikës 1 të këtij vendimi, ti tjetërsojë ose tua japë ato në përdorim të tretëve, përveç projekteve të investimit në zonat me përparësi zhvillimin e turizmit”, theksohet në vendimin e Qeverisë.

SCAN ka zbardhur listën e pasurive që i janë kaluar në administrim Ministrisë së Turizmit, ku bie në sy se disa prej pronave gjenden në zonat më të kërkuara bregdetare.  271 hektarë, të shpërndarë në 19 parcela gjenden në Bizë të Durrësit.

Rreth 160 hektarë sipërfaqe pyjore të ndara në 7 parcela gjendej në Shetaj po të Durrësit. Rreth 6.7 hektarë gjenden në Karpen të Kavajës, ndërkohë që në fshatin Peqinaj të po këtij qyteti i është dhënë në administrim Ministrrisë së Turizmit një sipërfaqe totale prej rreth 150 hektarësh.

Në listë nuk mund të mungonte Divjaka, ku janë kaluar në funksion të investimeve në turizëm 168.4 hektarë pyll,  ashtu si dhe një sipërfaqe totale prej 161.5 hektarë tokë arë e pozicionuar në zonën Karavasta e Re.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.