Pronat, turizmi dhe mungesa e “dashurisë” së Rusisë – Si ndikohet Mali i Zi nga anëtarësimi në NATO

Sektori i pasurive të paluajtshme në Mal të Zi ka shumë arsye për të qenë kundër anëtarësimit të vendit në NATO muajin tjetër. Ky sektor varet nga klientët rusë, të cilët përbëjnë më shumë se gjysmën e të ardhurave.

Influenca e shtetit ortodoks dhe sllav në ekonominë malazeze është e dukshme kudo. Billboard-e të mëdha në gjuhën ruse reklamojnë prona përgjatë bregdetit si dhe biznese të tjera e klube jahtesh të cilat zotërohen nga shtetas rusë.

Sektori bazohet aq shumë tek rusët për të blerë shtëpi dhe apartamente, saqë pothuajse të gjitha faqet online të agjencive real estate ofrojnë një version të tyrin në gjuhën ruse.

Rusia përbën 16% të investimeve të huaja në vend për vitet 2007-2015, një shifër prej mbi 1 miliardë eurosh. Kjo numër është edhe më i konsiderueshëm, nëse kemi parasysh se PBB e vendit është 4 miliardë euro, një e pesta e të cilit vjen nga turizmi.

Megjithatë, edhe disa nga agjentët e këtij tregu, si Marijana Toskovic preferojnë aderimin në NATO, duke konsideruar historinë e  konflikteve në Ballkan.

“Është ndoshta më mirë të bashkohemi, thjesht që të shmangim disa telashe në të ardhmen, në fund të fundit ky është Ballkani. Do të preferoja stabilitetin dhe paqen. Kjo është ajo që duam më tepër”, thotë Toskovic.

Por përveç tregut të pasurive të paluajtshme, një problem edhe më i madh paraqitet për turizmin, ku qeveria ruse po nxit qytetarët e saj të mos vizitojnë më Malin e Zi.

Gjatë Prillit, Maria Zakharova, zëdhënëse për Ministrinë e Jashtme, apeloi për bashkëqytetarët e saj të mendohen dy herë para se të drejtohen atje, duke e cilësuar si histeri anti-ruse.

Shtetasit rusë përbëjnë një të tretën e vizitorëve totalë, ku vetëm gjatë muajve Qershor-Korrik-Gusht, kalojnë mbi 2,1 milionë netë nëpër strukturat akomoduese në vend.

Rreziqet potenciale të cilat i kanosen ekonomisë dhe jo vetëm, kanë bërë që populli të jetë i ndarë në mendimin nëse vendi duhet t’i bashkohet NATO-s ose jo.

Mali i Zi e kishte akuzuar Rusinë në Tetor për organizimin e një grushti shteti gjatë zgjedhjeve të kaluara të Tetorit, akuza të cilat u kundërshtuan nga Rusia. Kryeministri i vendit, Dusko Markovic është shprehur në një intervistë këtë muaj se anëtarësimi në NATO do të japë një shtysë të fortë për rritje ekonomike.

Sipas Markovic, NATO do të rrisë sigurinë tek investitorët dhe efektet kanë filluar të bëhen të dukshme që tani, duke trefishuar investimet e huaja direkte në vend për tremujorin e parë, në 64,6 milionë euro.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.