Propozimet e KASH – Rrapaj: Përpjekje që fermerët të futen në skemën e sigurimeve
Komiteti i Emergjencave Civile vazhdon të bëjë edhe bilancet e para të dëmeve nga përmbytjet e ditëve të fundit. Ndërkohë Këshilli I Agrobiznesit shqiptar kërkon nga qeveria që të ketë lehtësime për fermerët e dëmtuar. Agim Rrapaj, president I KASH, shprehet në një prononcim për TV SCAN, se qeveria duhet të ndërhyjë për të lehtësuar fermerët nga disa lloje detyrimesh.
“ Në propozimet e para që ne do t’i bëjmë qeverisë ka të bëjë lidhur me fermerët të cilët kanë kredi. Fermerët të cilët kanë borxhe të vjetra, fermerët të cilët nuk kanë mundësi t’i shlyejnë këto pas ngricave dhe dy përmbytjeve radhazi. Në do të mendojmë dhe do të propozojmë një projekt të plotë lidhur me faljen e këtyre dhe heqjen dorë nga gjyqet që qeveria po bën me fermerët për këto dëmshpërblime, për këto gjoba, për këto detyrime që ata kanë ndër vite. Pra, borxhet e vjetra duhet të falen tashmë në këtë situatë që është krijuar në mënyrë që fermerët të vazhdojnë të punojnë. E dyta, jemi në prag tashmë të hapjes së programit IPARD dhe skemave mbështetëse.”
Kreu i Agrobiznesit tha se tashmë ka ardhur koha që fermerët të futen në skemën e sigurimeve.
“Ne do të vazhdojmë të bindim fermerët që ata të futen në fushën e sigurimeve sepse është zgjidhja afatgjatë, e qëndrueshme dhe nga më të leverdishmet për fermerët dhe për të gjithë ne të tërë.”
Sipas të dhënave zyrtare nga Komiteti I Emergjencave Civile, gjithsej janë përmbytur 3193 banesa dhe 40 biznese, ndërsa sipërfaqja nën ujë është 7874 ha. Por kjo shifër nuk është përfundimtare, ndërkohë që vazhdojnë konstatimet në terren.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.