Protesta në Kukës, reagon Basha: Të pezullohet tarifa e të tërhiqet policia
Kreu i opozitës Lulzim Bash aka reaguar ndaj protestës së sotme në Kukës kundër vendosjes së tarifës për rrugën Durrës-Kukës. Në daljen për mediat, Basha i kërkoi kryeministrit të pezullojë tarifën, që e konsideroi si më të lartën në Europë dhe të përcaktojë kalimin e fondit që mblidhet nga karburanti për mirëmbajtjen e rrugës.
“Protesta e sotme tregon se durimit i ka ardhur fundi. Ky është reagimi për grabitjen e dyfishtë që Rama u bën xhepave të shqiptarëve me taksën më të lartë të qarkullmit dhe tarifën më të lartë në Europë” tha Basha, ndërsa i kërkoi kryeministrit që të tërheqë forcat policore nga përballja me protestuesit.
Deklaratë e Kryetarit të Partisë Demokratike, Lulzim Basha:
Protesta e sotme, tregon se durimit i ka ardhur fundi.
Ky është reagimi për grabitjen e dyfishtë që Rama i bën xhepave të shqiptarëve me taksën më të lartë të qarkullimit dhe me tarifën më të lartë për “Rrugën e Kombit”.
Kjo tarifë është një gjobë ndaj popullit. Është taksim i dyfishtë sepse Edi Rama u merr shqiptarëve me taksën e qarkullimit, 200 milionë euro në vit për mirëmbajtjen e rrugëve. Por nuk u mjaftua me kaq. Ai vuri edhe një nga tarifat e rrugës më të larta në Europë për kalimin e Rrugës së Kombit.
Edi Rama e vendosi tarifën me dhunë. Me dhunën e kartonave në parlament, dhunën e policisë, dhe dhunën e gjithë shtetit, Edi Rama po grabit qytetarët për të mbushur xhepat e tij.
Tarifa e Rrugës së Kombit është dënim për qytetarët e një nga zonave më të varfra të Shqipërisë, që kanë vuajtur historikisht nga izolimi dhe shpërfillja. Ky është populli që Rama përçmon, kjo është revolta, që Rama thotë nuk ekziston. Ky është populli me të cilin Rama u tall se nuk ngrihet dot.
Ky është vetëm fillimi. Sepse nga nesër, një vjedhje tjetër e madhe i bëhet popullit me taksën e pronës, dhe biznesit të vogël me TVSH-në.
Sot, qytetarët vendosën t’i thonë ndal dhunës së Edi Ramës. Qytetarët sot i treguan Edi Ramës, se një qeveri antipopullore dhe antikombëtare nuk e mposht dot popullin.
Në emër të opozitës i kërkoj Edi Ramës të pezullojë menjëherë tarifën e “Rrugës së Kombit”. Pagesa për mirëmbajtjen e “Rrugës së Kombit” të kryhet nga fondi që mblidhet me taksën e qarkullimit, plot 200 milionë euro në vit.
I bëj thirrje Ramës, të tërheqë menjëherë policinë dhe të ndalë dhunën barbare mbi protestuesit. Revolta e banorëve është revoltë që buron nga padrejtësia dhe dhuna qeveritare kundër tyre.
Kur përplaset populli i ndershëm me një qeveri të korruptuar, fiton populli.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.