Protesta të dhunshme në Francë – Ministri i Brendshëm: Do nisim diskutimet për ‘autonominë’ e Korsikës!
Ministri i Brendshëm francez Gérald Darmanin tha se vendi është i përgatitur të diskutojë “autonominë” e Korsikës pas përleshjeve të dhunshme. Darmanin mbërriti në ishullin mesdhetar të mërkurën në një përpjekje për të rivendosur qetësinë pas disa ditësh trazirash.
Protestuesit janë përplasur me oficerët e policisë për disa ditë pasi një figurë pro-pavarësisë u sulmua në një burg francez. Darmanin do të takohet me përfaqësuesit e zgjedhur në Korsikë ka premtuar një “raund të paprecedentë diskutimesh” për të zgjidhur çështjen.
Gilles Simeoni, presidenti i këshillit ekzekutiv të Korsikës, e ka mirëpritur ofertën, por thotë se fjalët e Darmanin duhet “të ndiqen dhe t’i jepet formë konkrete”. Zemërimi në Korsikë shpërtheu pasi një vrasës i dënuar dhe i pavaruri Yvan Colonna u sulmua në një burg kontinental francez në Arles.
Colonna, i cili po vuan dënimin e përjetshëm për vrasjen e prefektit francez Claude Érignac në vitin 1998, u la në koma pasi u sulmua nga një i burgosur tjetër. Studentët, organizatat nacionaliste dhe sindikatat në Korsikë kanë akuzuar shtetin se mban përgjegjësi. Colonna ka apeluar prej kohësh që të kthehet në burg në Korsikë.
Franca ka hequr statusin e të burgosurit si një “i burgosur me shqetësim të veçantë” (DPS), por masa nuk ka arritur të qetësojë protestuesit. Gjithsej 102 persona, përfshirë 77 oficerë policie, u plagosën në përleshjet e ashpra të së dielës në qytetin e Bastias.
Të mërkurën, disa ndërtesa publike u pushtuan nga demonstruesit, disa prej të cilëve mbanin slogane anti-qeveritare. Darmanin ka pranuar se është “një pjesë e përgjegjësisë shtetërore” në sulmin e Colonna-s, por thotë se kritikat e protestuesve kanë qenë “të tepruara”.
Vendimi për të hequr kontrollin historik të Francës mbi Korsikën, një ishull me rreth 330,000 banorë do të ishte i paprecedentë. Zyrtarët në Korsikë kanë vënë në dukje shembullin e suksesshëm të ishujve Azores, që ruan autonominë nga Portugalia.
Por aktivistët pro-pavarësisë kanë bërë thirrje që Franca të lejojë Korsikën të ketë më shumë kontroll mbi taksat, punësimin dhe gjuhën e saj. Vendimi për t’i ofruar Korsikës “autonomi” ka të ngjarë të ndikojë edhe në zgjedhjet presidenciale franceze, me më pak se një muaj deri në raundin e parë të votimit.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.