Protestat e dhunshme të “jelekëve të verdhë” në Francë, Macron i drejtohet kombit: Rritje page me 100 euro dhe një debat të madh publik
Presidenti francez Emannuel Macron paralajmëron masa të shpejta si përgjigje ndaj protestave të dhunshme që kanë përfshirë Francën kohët e fundit.
Në komunikimin për mediat, Macron dënoi dhunën që ka përfshirë vendin si rrjedhojë e protestave të “jelekëve të verdhë” duke paralajmëruar se nuk do të ketë falje për ata që kanë shkelur ligjin ndërsa nga ana tjetër njoftoi hapjen e një gjendje emergjence ekonomike e sociale që konkretizohet në një seri masash në mbështetje të katëgorive më të dobëta; pensionistëve e punëtorëve me pagë minimale.
Duke nisur nga viti 2019, punonjësit me pagë minimale do të kenë një rritje page me 100 euro.
Në fjalimin 15 minutësh ku presidenti u shfaq me një pozë të ngurtësuar e me tone retorike, ai njoftoi nisjen e një debate të madh publik mbi tematika të mëdha që nisin që nga raporti mes jetës së përditshme (pasja e një shtëpie, martesa, ngrohja) deri te ngrohja klimatike, mbi të gjitha në zona lokale.
Macron-it i intereson që të ndërtojë dialogun social në mënyrë që të rrisë edhe popullaritetin e tij që aktualisht ka rënë në nivelin e 18-21 % sipas sondazheve. Ideja e një debati të madh kombëtar që është hedhur nga kreu i Këshillit të Ministrave Edouard Philippe mbi temën e fiskalizimit do të zgjerohet duke përfshirë edhe aspekte politike.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.