PS, gati ligjin e ri për Presidentin: “Jo shpërndarje e Parlamentit, betimi i gjyqtarëve në KLGJ”
Tre deputetë të partisë socialiste kanë përfunduar hartimin e draftit të ri ligjor, që sipas tyre zgjidh ngërçet artificiale. Në draft ligjin që pritet të diskutohet edhe në komisionet parlamentare në javët që vijnë, parashikohen 3 ndryshime thelbësore, duke filluar me betimin e gjyqtareve që nuk do të jetë më e nevojshme të betohen te presidenti, por te KLGJ. Ndryshim tjetër thelbësore lidhet me datën e zgjedhjeve apo edhe me emërimin e ministrave që nuk mund të bëhet pa u konsultuar me mazhorancën.
Sipas ndryshimit ligjor, nëse data e zgjedhjeve nuk caktohet me consensus nga partitë politike, atëherë nuk është presidenti që e vendos por përcaktohet data e kërkuar nga partia që është në pushtet. Ndërsa shtyrja e datës së zgjedhjeve mund të bëhet vetëm pas konsultimeve me partitë ose partinë në mazhorancë. Në lidhje me ndryshimin tjetër për dekretimin e ministrave, presidentit i jepet kohë 7 ditë dhe nëse brenda këtij harku kohor nuk jep një përgjigje, atëherë është kuvendi që bën edhe emërimin. Sa i takon debatit për shpërndarjen e parlamentit, presidenti e ka këtë të drejtë vetëm kur kuvendi, në dy raundet e punimeve nuk zgjedh dot kryeministrin.
Një pikë tjetër që pritet të këtë diskutime është ajo që lidhet me emërimin e kryeministrit, ku ndryshimet parashikojnë që nëse partitë politike nuk japin mbështetjen për asnjë kandidat, atëherë duhet tja japë propozimit nga partia që ka numrin më të madh të vendeve të kuvend. Deputeti i Partisë Socialiste që do të jetë edhe relatori i ligjit Adnor Shameti, tha se ky ligj nuk parashikon kufizim kompetencat por vetëm rregullim të disa pikave që sillnin bllokim artificial. Sipas tij hartimi I një ligji të tillë me 45 nene, është një detyrim kushtetues.
Arbër Hitaj / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.