PS propozime të reja në Kod: Gjyqtarët që s’kalojnë vettingun, jo në listat e 18 qershorit

Partia Socialiste depoziton në Kuvend një propozim të ri për moskandidimi në zgjedhjet e ardhshme parlamentare të gjyqtarëve dhe prokurorëve që nuk i janë nënshtruar procesit të vettingut.

Në emër të PS-së, deputetit Taulant Balla, depozitoi në Komisionin për Reformën Zgjedhore nismën që nuk lejon përfshirjen në listat zgjedhore edhe të atyre gjyqtarëve dhe prokurorëve që kanë plotësuar formularin e vetëdeklarimit, por që procesi i rivlerësimit nuk ka përfunduar.

“Propozimi që ne do të depozitojmë sot ka të bëjë me një shtesë në kodin zgjedhor që parandalon përfshirjen në listën e kandidatëve të gjithë ata gjyqtarë apo prokurorë të cilët kanë dhënë dorëheqjen dhe nuk i janë nënshtruar procesit të vettingut, ose e kanë plotësuar formularin e vetëdeklarimit, por procesi i rivlerësimit nuk ka përfunduar. Ky është një hap i rëndësishëm sepse sikurse Kuvendi i Shqipërisë ka miratuar edhe ligjin për parandalimin e personave me rekorde kriminale që të përfshihen në procesin zgjedhor, kështu edhe gjyqtarë apo prokurorë që nuk kanë kaluar vettingun apo nuk e kanë përfunduar procesin e rivlerësimit nuk mund të përfshihen në listat zgjedhore, deklaroi Balla.

Deputeti Balla ftoi përfaqësuesit e opozitës që të rikthehen në Komisionin për Reformën Zgjedhore për të shqyrtuar propozimet e reja për ndryshimet në Kod.

Nëse kjo nuk do të arrihet në ditët në vijim tha Balla, Partia Socialiste do të gjejë mënyra të tjera ligjore që përcakton rregullorja e Kuvendit në mënyrë që propozimet të bëhen të ligjshme.

Florenc Drizari/RTV SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.