Pse regjistrimet në shkollat dhe universitetet private janë rritur ndjeshëm gjatë pandemisë?!

Kur COVID-19 goditi botën, shumë ekspertë paralajmëruan se kolegjet dhe universitetet mund të shkatërroheshin totalisht nga pasojat e pandemisë. Disa prej tyre parashikuan rënie të regjistrimit deri në 20%. Deri më tani, ato parashikime fillestare ishin më të këqija se ato që kanë ndodhur në të vërtetë. Një muaj pas fillimit të semestrit vjeshtor të vitit akademik 2020-2021, regjistrimi i përgjithshëm ishte vetëm 3% më i ulët se në të njëjtën kohë një vit më parë.

Sidoqoftë, një lloj shkolle po ecën më mirë: kolegjet fitimprurëse ose ndryshe ato private. Regjistrimi i tyre mesatar është rritur me 3%. Në të kundërt, në universitetet katër-vjeçare jofitimprurëse publike dhe private, regjistrimet ranë përkatësisht me rreth 1.4% dhe 2%.

Regjistrimet kanë rënë shumë më shumë në kolegjet e komuniteteve, të cilët kishin 9.4% më pak studentë këtë vit. Ky ndryshim ndodhi edhe pse disa ekspertë parashikuan se kolegjet e komuniteteve do të ishin më tërheqëse në epokën COVID-19 për shkak të kostove të tyre më të ulëta dhe politikave fleksibël të transferimit.

Faktorët prapa kësaj tendence

Pse më shumë studentë ndjekin kolegje fitimprurëse në mes të një pandemie?

Kjo rritje është edhe më e habitshme duke pasur parasysh që regjistrimi në shkolla fitimprurëse – shpesh të kritikuara si me çmim të lartë dhe me cilësi të ulët – kishte rënë me një mesatare prej 10.5% në vit midis 2015 dhe 2019.

Kolegjet dhe universitetet fitimprurëse priren të jenë me përvojë të lartë me mësimin në distancë, ata kanë më shumë fleksibilitet për të vendosur burime financiare sipas nevojës dhe ata kanë gëzuar politika të favorshme nën administrimin e Trump, i cili anuloi veçanërisht një rregull të epokës së Obamës që synonte t’i mbante ata përgjegjës për t’u siguruar që të diplomuarit të punësohen me fitim.

Duke pasur parasysh rezultatet e zgjedhjeve të fundit presidenciale, rritja e regjistrimeve në këto lloj shkollash mund të jetë jetëshkurtër. Të diplomuarit e kolegjeve fitimprurëse po paguajnë kreditë e tyre të shkollimit me ritme më të larta dhe Presidenti i zgjedhur Joe Biden është zotuar të ndalojë këto shkolla të “përfitojnë nga studentët”.

Më shumë para të pakufizuara

Shumë universitete tradicionale pësuan kosto të konsiderueshme për të rifilluar mësimin dhe kërkimin në mënyrë të sigurt në kampus-et në vjeshtën e vitit 2020. Shkollat fitimprurëse kanë shumë më tepër programe në internet sesa homologët e tyre jofitimprurës. Për këtë arsye, ata nuk kishin nevojë të shpenzonin më shumë për të operuar në mënyrë të sigurt këtë vjeshtë.

Shkollat fitimprurëse janë gjithashtu përgjithësisht më të shkathëta financiarisht sesa kolegjet dhe universitetet jofitimprurëse publike dhe private. Ata shpesh mbajnë rezerva të konsiderueshme parash me kufizime minimale në shpenzime.

Universitetet jofitimprurëse, posaçërisht publikët, zakonisht kanë më pak para në dorë sepse ato tentojnë të funksionojnë me buxhet vjetor operativ që i ridrejtojnë tepricat përsëri në programe dhe shërbime. Dhe madje edhe ata me donacione të konsiderueshme përballen me kufizime se si mund t’i shpenzojnë ato para.

Gjatë pandemisë, shkollat fitimprurëse kanë pasur më shumë burime në dispozicion sesa homologët e tyre. Ata më pas shpenzuan më shumë në përpjekjet e marketingut. Për shembull, nga 10 universitetet amerikane që shpenzuan të paktën 1.2 milion dollarë në reklamat e Google në Mars 2020, gjashtë – ose 60% – ishin fitimprurëse, edhe pse fitimet përfaqësojnë vetëm 17% të të gjitha institucioneve katër-vjeçare.

Përveç reklamave në rritje, institucionet fitimprurëse gjithashtu zgjeruan ndihmën financiare kur goditi pandemia. Kjo u dha studentëve edhe më shumë nxitje për t’u regjistruar. (QZ)

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.