Pse Shqipëria do të dërgojë satelitë në orbitë? – Rama jep arsyet
Kryeministri Edi Rama ka mbajtur një komunikim me gazetarët ku ka shpjeguar se përse Shqipëria ka vendosur të dërgojë dy satelitë në hapësirë, përkatësishta Albania 1 dhe Albania 2.
“Shqipëria do të ketë satelitë dhe do ti ketë shpejtë, për të forcuar kontrollonin në territorin e saj në të gjitha aspektet, dhe do të ketë jo vetëm satelitë por do të ketë edhe dronë inteligjentë, që do të na ndihmojnë për ta çuar vendin në një nivel tjetër nga aspekti i administrimit të territorit të vet, dhe këto janë mjete të një teknologjie të re që garantojnë një monitorim të territorit për shumë gjëra, që nga kufijtë, tek ndërtimet që kryhen në territor, te monitorimi që lidhet me informacionin që i duhet strukturave të shtetit për luftën kundër trafiqeve, për të çuar deri në fund përpjekjet për të zeruar territoret e kultivimit të lëndëve narkotike, për të mbjellat e bujqësisë, për shumë shumë çka, dhe natyrisht për të luftuar në mënyrë shumë cilësore krimin e organizuar duke pasur kapacitete monitoruese të paimagjinueshme dhe patjetër duke pasur në dispozicion këtë arsenal për të lehtësuar jashtëzakonisht shumë marrëdhëniet që zhvillohen në territor dhe që komprometohen nga inspektorë, nga punonjës policie të korruptuar. Kështu që nuk do të bëjmë asgjë ne që ndodh për herë të parë në Shqipëri, vende të tjera të zhvilluara e bëjnë këtë gjë, dhe e mira e kësaj kohe teknologjisë super nivel i lartë është se nuk ka nevojë të jesh një vend super i zhvilluar për të bërë një kapërcim epokal duke i vënë vetes në dispozicion mjete të kësaj natyre që kanë një sofistikim që i kapërcen kufijtë e imagjinatës,” është shprehur Rama
“Shqipëria do ti ketë satelitët e saj dhe do ti ketë shpejt ashtu si kundër do të ketë dhe dronet e saj inteligjentë dhe do të rrisë në mënyrë eksponenciale kapacitetet e kontrollit të territorit në të gjitha aspektet, për zjarret, për emergjencat civile, natyrisht përdorimi i këtyre mjeteve përsa i përket republikës së Shqipërisë do të ketë një përdorim për çështje që kanë të bëjnë me punët civile të vendit dhe me luftën kundër krimit të organizuar. Nuk do të jenë për çështje të natyrës së veprimeve apo të ofensivave ushtarake”, ka përfunduar Rama.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.