Puna në të zezë, në 40% – BB: Jeni të parët në rajon, 1 në 2 të rinj, informal
Në Shqipëri informaliteti në punë, vijon të jetë një problem mjaft i përhapur. Banka Botërore vlerëson se, kjo normë në vendin tonë është afër 40%.
Përveç kësaj, Shqipëria në këtë drejtim mban vendin e parë në rajon, me një diferencë mjaft të konsiderueshme me ndjekësit më të afërt.
Siç duket qartë edhe nga grafiku, pas Shqipërisë vjen Serbia me një normë informaliteti në punë në pak më shumë se 20%, pra thuajse gjysmën e normës që regjistrohet në vendin tonë.
Të dhënat e Bankës Botërore i referohen vitit të kaluar, periudhë kur edhe ka kaluar vala më e madhe e aksionit të qeverisë për të formalizuar vendet e punës.
Një normë e tillë e përhapjes së punës në të zezë tregon se përpjekjet nuk kanë qenë aspak të mjaftueshme, ose, se, përpara aksionit, fenomeni ka pasur një shtrirje bindshëm më të gjerë se vlerësimet paraprake.
Sipas vetë Bankës Botërore, në 2014, puna në të zezë zinte pak më shumë se 50% të totalit të vendeve të punës në vend.
Të dhëna të tjera ndërkohë, tregojnë se, grupmosha më e predispozuar që të punojë në të zezë në vendin tonë është ajo nga 15 deri në 24 vjeç, me një normë në 50%. Kjo do të thotë se, në Shqipëri, një në dy të rinj realisht punon në të zezë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.